En Galicia non nos podemos queixar de paisaxes: temos mar, ríos, praias, montañas, dunas e fragas. Un día podemos ascender aos cumes do macizo de Pena Trevinca, que superan os 2.000 metros, e ao seguinte navegar polos impresionantes canóns do río Sil ou do Miño. Todo isto é o que pon en valor a proposta de Turismo de Galicia “Escenarios ao volante”, que convida a percorrer case 1.000 quilómetros por 110 concellos galegos.
Galicia, situada nun enclave privilexiado onde o verde das montañas funde co azul das costas, regálanos paisaxes de auténtico ensueño. Así, os mapas publicados na páxina web de Turismo de Galicia anímanos a coñecer diversos puntos da xeografía. Non só pola súa natureza: en cada recuncho tamén se percibe o vínculo entre as persoas e a terra que pisan, un diálogo constante entre o modelado natural e a pegada das xeracións que habitaron vilas e cidades.
Os bancais da Ribeira Sacra, os mosaicos de prados, as hortas traballadas con coidados, os camiños e estradas que percorren a súa xeografía… Todo isto é paisaxe.
Costa e interior
“Escenarios ao volante” inclúe itinerarios tanto pola costa como polo interior, para descubrir esa Galicia azul e verde que se transforma co paso das estacións. Así, un mesmo percorrido pode ofrecer imaxes e sensacións diferentes segundo se realice no outono ou na primavera.
Rías, cantís, cabos, bosques, vales, montañas e espazos naturais, como as serras orientais ou o Macizo Central ourensán, forman parte desta proposta.
Trátase dunha selección de roteiros pensada para gozar sen présas, permitindo que cada viaxeiro constrúa a súa propia ruta e viva, á súa maneira, as emocións que lle transmitan estas paisaxes galegas.
Miradoiros: natureza ou cidade?
Turismo de Galicia propón tamén unha selección de 50 miradoiros imprescindibles nos que merece a pena deter o coche e gozar das vistas. Espallados por toda a xeografía de Galicia, tanto no interior como na costa, estes puntos panorámicos permiten descubrir Galicia dende perspectivas únicas.
Entre eles, o Miradoiro do Cortelliño en Baiona, as vistas dende Seixo Branco en Oleiros, os vales da Fonsagrada dende o Hospital de Montouto ou a visión do encoro de Santo Estevo dende o Miradoiro de A Cividade, en Sober.
A proposta tamén quere poñer en valor o encanto das cidades galegas, cargadas de historia e cultura. Así, suxiren os lugares para contemplar as sete grandes urbes de Galicia.
Na metade norte, destacan o Miradoiro de San Pedro na Coruña; o da Ermida de Chamorro en Ferrol; a Muralla de Lugo; ou o Paseo dos Leóns, con vistas privilexiadas á Catedral de Santiago. No sur, sobresaen o Miradoiro A Caeira, en Poio, preto de Pontevedra; o Monte do Castro, en Vigo, con panorámicas cara ás Illas Cíes; e o Miradoiro de Montealegre, en Ourense.
Paisaxes literarias
A paisaxe galega foi, é e seguirá sendo unha fonte inesgotable de inspiración literaria. Por iso, “Escenarios ao volante” inclúe un apartado especial dedicado á ambientación literaria, onde territorio e palabra van da man.
Se cada pobo expresa a súa alma a través da súa literatura, e os seus poetas recollen nos versos os soños e inquedanzas colectivas, esta proposta permite revivir esas emocións sobre o propio terreo.
O itinerario divídese en dúas rutas: “Ditos e cancións populares” e “Citas de autores”. Entre os exemplos, atopamos refráns como “En Ares, non te pares. En Redes, non te quedes. En Caamouco, para pouco”, que invitan a descubrir estes recunchos da provincia da Coruña. Ou a visita a Tribes (Ourense), para pasear polos escenarios que inspiraron ao seu poeta, Manuel Luís Acuña, na obra “Noite de Inverno”.
Un percorrido así non é só unha viaxe polos lugares, senón polas páxinas que lles deron vida. En Galicia, a paisaxe tamén se le.
Podes consultar os itinerarios de “Escenarios ao volante” na seguinte ligazón.
