Aprender sobre cales son as condicións xenéticas e ambientais das diferentes enfermidades e que investigacións de grandes proxectos sobre este eido se están a realizar na actualidade. Estes serán algúns dos temas que abordará o doutor Ángel Carracedo, una das figuras máis destacadas do ámbito da Medicina Legal, o próximo luns nas XXXV Xornadas Luis Asorey.
Tralo comezo destas conferencias gratuítas, coordinadas polo doutor Antonio Rigueiro, quen falou sobre a presenza de case a metade das plantas medicinais avaliadas por Europa en Galicia, a Real Academia Galega de Ciencias (RAGC) e a Deputación de Lugo, coa colaboración do Campus Terra da Universidade de Santiago, continuarán coas XXXV Xornadas Luis Asorey, que nesta edición versa sobre a importancia da alimentación, o medio ambiente e a saúde.
Gañador do “Premio Nobel do Medicamento”
A vindeira conferencia celebrarase este luns, 25 de novembro. O encargado de impartila será o doutor Ángel Carracedo, catedrático de Medicina Legal da Universidade de Santiago, director da Fundación Pública Galega de Medicina Xenómica ―centro onde se centraliza o diagnóstico xenético de Galicia, con máis de 40.000 pacientes ao ano―, director da Fundación INGADA ―Instituto Galego do TDAH e trastornos asociados― e da Fundación Kaertor para a busca precoz de fármacos, ademais de membro da Real Academia Galega de Ciencias.
Participa en organismos internacionais como a Axencia Europea do Medicamento, Comité da Cruz Roja Internacional, Consorcio Internacional de Enfermidades raras, Comité forense do Tribunal Penal Internacional da Haia, entre outros. Na actualidade é o presidente da Academia Internacional de Medicina Legal. Recibiu numerosos premios, entre eles o Adelaide Medal, a distinción máis importante no eido forense a nivel mundial; ou o Galien Medal, coñecido como o Premio Nobel do Medicamento. É Doutor Honoris Causa por oito universidades de Europa e América.
Relación entre xenética, medioambiente e saúde
Na súa conferencia, Carracedo afondará na relación entre a xenética, o medio ambiente e a saúde; en particular como os xenes e o ambiente inflúen na aparición de certas doenzas. O profesor afirma que “somos xenes e ambiente tanto na saúde como na enfermidade”.
Salienta que “as enfermidades humanas teñen unha heredabilidade media do 50%, é dicir, que o ambiente conta tanto como a xenética”. Nesta liña, pon de relevo que, “en contra do que moita xente pensa, en múltiples doenzas como o cancro ou no caso da lonxevidade, conta máis o ambiente, e nos trastornos psiquiátricos a predisposición xenética é importante pero, aínda así, o ambiente pode ser o desencadeante”. Así, estase a investigar cales son os condicionantes xenéticos e ambientais das diferentes enfermidades.
Carracedo abordará ademais os grandes proxectos sobre xenética que están en marcha na actualidade para coñecer e progresar na denominada medicina personalizada. Nestes intres as súas principais liñas de investigación inclúen a xenética do cancro e das enfermidades psiquiátricas en idade infantil, as enfermidades raras e a medicina personalizada.
Primeiro, esta conferencia me encantaría fora grabada.
En referencia a elo, dicir que obrigatoriamente debería facerse un estudio xenético de cada paciente con mais de un caso de cancro en familia directa, No meu caso, teño cancro de mama, e tiven na familia mais cercana 7 casos , de diferentes tipos de cancro. Creo que claramente o noso sistema inmunitario recolle alguna característica xenética que nos predispón a padecer a enfermedade.
Un saúdo.
Parabens ao Dr. Carracedo polas divulgación destes temas e, sobre todo, pola súas investigacións sobre xenómica e cancro , algo fundamental para a nosa sociedadee a do s. XXI e seguireao sendo nos próximos séculos.