Únete á nosa canle de Whatsapp
A astrofísica Begoña Vila Costas (Vigo, 1963), será a convidada este martes 13 de abril, ás 19.30 horas, no ciclo de encontros Vigo Científico, organizados por GCiencia e o Consorcio da Zona Franca de Vigo, para reunir a algúns dos principais referentes científicos da cidade. Vila será a terceira participante dun ciclo que comezou en marzo coa inmunóloga África González e o enxeñeiro de telecomunicacións Fernando Aguado, e que se pechará o vindeiro 20 de abril co biólogo mariño Manuel E. Garci.
Begoña Vila, licenciada en Física pola Universidade de Santiago de Compostela (USC) e especializada en Astrofísica pola Universidade de La Laguna (Tenerife) e o Instituto de Astrofísica de Canarias (IAC), é na actualidade enxeñeira de sistemas no centro Goddard da NASA en Greenbelt (Maryland), moi preto de Washington, capital dos EUA. Alí coordina un dos equipos de traballo no que será un dos grandes fitos da exploración espacial: o telescopio James Webb.
Este instrumento, froito da colaboración entre a NASA, a Axencia Espacial Europea e a Axencia Espacial do Canadá, será arredor de 100 veces máis potente có Hubble. Funcionará no espectro infravermello próximo e mediano, e grazas a el será posible mirar cara a atrás no tempo, observando galaxias formadas miles de millóns de anos antes de agora.
O deseño e a construción do James Webb supuxo un enorme desafío científico e tecnolóxico, non libre de atrancos, xa que desde a súa xénese retrasouse varias veces a data do lanzamento previsto. Destaca, entre outras moitas características, o seu espello principal, composto por 18 pezas, e o seu parasol que ten as dimensións dunha pista de tenis. O James Webb é tan grande que deberá viaxar ‘dobrado’ no foguete Ariane 5, da ESA, que o levará ata o espazo. Neste vídeo, a propia Begoña Vila resume o proxecto:
Durante a súa traxectoria, na que tamén exerceu nas universidades de Manchester e Cardiff e en empresas canadenses e a axencia espacial do país norteamericano, Vila recibiu recoñecementos como a Medalla da NASA ao Logro Público Excepcional (2016), polos significativos avances acadados no seu traballo da misión James Webb. En 2017, a Xunta de Galicia outorgoulle o Premio María Wonenburger, que recoñece o labor de mulleres científicas galegas. Nesta entrevista con GCiencia en 2019 falaba sobre a súa traxectoria:
Begoña Vila: “Co novo telescopio da NASA miraremos as primeiras estrelas”
