A quinta edición do ciclo de charlas e mesas redondas Ciencia en feminino, que organiza GCiencia en colaboración coa Deputación de Pontevedra co gallo do 8M, arrinca a súa terceira sesión cunha entrevista á economista María Loureiro, catedrática na Universidade de Santiago (USC) e directora científica do centro interuniversitario ECOBAS. O seu prestixio internacional é indiscutible: é unha das economistas máis citadas de España e está, segundo a clasificación de Stanford, entre o 2% de científicos e científicas máis influentes do mundo. A súa brillante traxectoria valeulle o Premio María Josefa Wonenburger en 2024, concedido pola Unidade de Muller e Ciencia da Xunta de Galicia, converténdose así na primeira economista en conseguilo.
Con María Loureiro falaremos da importancia de rachar os estereotipos sobre as ciencias sociais e recoñecer que os problemas aos que se enfrontan as mulleres investigadoras neste eido non difiren tanto dos desafíos que presentan as ciencias máis técnicas. Abordamos con ela o teito de cristal, a fenda salarial e as dificultades á hora de conciliar. Esta entrevista é a antesala do peche de Ciencia en feminino 2025, que celebrará a súa última sesión o mércores 26 de marzo. Na mesa redonda conducida pola xornalista Gloria Montenegro participarán as científicas galegas Yasmina Martínez, Marta Castiñeira e Paula Gutiérrez-Muñoz sobre como se poden romper os estereotipos que aínda rodean a practica científica.
