A primeira sesión de Ciencia en feminino arrinca da man da inmunóloga África González, quen inaugura o ciclo de charlas e mesas redondas de GCiencia en colaboración co Deputación de Pontevedra co gallo do 8M. Falamos coa catedrática da Universidade de Vigo (UVigo) e Premio María Josefa Wonenburger 2025 —a máxima distinción para as mulleres científicas en Galicia— da situación da muller na ciencia e dos obstáculos aos que aínda se teñen que enfrontar moitas investigadoras para desenvolver a súa traxectoria nun escenario de igualdade efectiva.
Ciencia en feminino celebrará as restantes sesións os mércores do mes de marzo ás 19 horas. O día 11 participarán as investigadoras galegas Laura Castro, Gloria González e Beatriz Fernández nunha mesa redonda sobre como derrubar os estereotipos que aínda pesan sobre a muller científica. A terceira sesión, o 18 de marzo, convida a catedrática de Matemáticas da Universidade de Santiago (USC) Elena Vázquez Abal, unha figura de recoñecido prestixio no eido da divulgación. O ciclo pecharase o día 25 da man das investigadoras Soledad Torres, Iria Gómez e Ainara Díaz, coas que se abordarán os principais obstáculos da carreira investigadora para as mulleres.
