Estas son as zonas do Camiño Francés por Galicia con máis risco de picadura de carracha

O merendeiro de Pasantes, a ponte da Áspera e o miradoiro de Pedrafita son tres dos dez puntos do Camiño Francés ao seu paso por Galicia con máis risco de picadura de carracha. Esta é unha das principais conclusións dun estudo elaborado pola investigadora Susana Remesar Alonso da Universidade de Santiago (USC). O obxectivo do traballo é determinar cales son as zonas de risco para evitar que os peregrinos sufran as picaduras destes artrópodos, transmisores de numerosas enfermidades como Lyme e a febre hemorráxica de Crimea-Congo.

Carrachas positivas en varias bacterias

A única especie de carracha atopada en todas as etapas foi Ixodes ricinus. Unha elevada porcentaxe dos individuos analizados deron positivo en Borrelia, patóxeno asociado á enfermidade de Lyme. Segundo presenta Remesar Alonso no seu estudo, a presenza deste xénero de bacterias foi maior nas primeiras etapas nas que se fixo a mostraxe: O Cebreiro, Triacastela e Sarria. É dicir, nelas hai un maior risco de infección. Amais disto, Ixodes ricinus atopouse sobre todo no seu estadio de ninfa —é dicir, cando aínda non son adultas—, polo que son moito máis difíciles de detectar debido ao seu pequeno tamaño.

A investigadora da USC, na memoria técnica, expón que tamén de identificou a especie Dermacentor marginatus que, xunto a outros exemplares de Ixodes frontalis, deron posivito no xénero de bacterias Rickettsia spp. Dúas das tres especies detectadas deste patóxeno, que infectou as carrachas da mostraxe, poden ocasionar unha síndrome coñecida como DEBONEL e que pode ocasionar síntomas como febre, decaemento e cefalea. No 90% dos casos a carracha pica no coiro cabeludo, provocando dor e caída do pelo.

Precaucións ante unha picadura

“Tendo en conta que é necesario que transcurran varias horas dende o inicio da picadura das carrachas para que se produza a transmisión destes patóxenos, é recomendable ter precaución e revisar o corpo e a roupa para detectar a posible presenza de carrachas e para poder retiralas o máis axeitadamente posible”, advirte Remesar Alonso no seu estudo. Así mesmo, lembra que as medidas máis eficaces para evitar as picaduras son o uso de repelentes, camiñar pola zona central dos camiños, usar calzado pechado e empregar roupa clara. De igual modo, é preciso revisar ben o corpo cando se chegue á casa, especialmente as axilas, ínguas, orellas, pelo, detrás dos xeonllos o embigo e a cintura.

No caso de localizarse algunha debe extraerse o antes posible empregando pinzas, colocándoas preto da pel e tirando suavemente; a continuación recoméndase gardar a carracha nun bote con alcol por se fose preciso analizala posteriormente, e lavar con auga e xabrón a ferida. Están contraindicados o uso de aceites ou calor para extraer as carrachas, e tampouco se deben cortar.

O roteiro máis antigo de Europa

O traballo realizado pola investigadora da USC ten a súa orixe nun proxecto de investigación financiado pola Cátedra do Camiño de Santiago e das Peregrinacións da USC. Segundo indica Remesar Alonso, escolleu a análise do Francés porque “é o roteiro máis antigo de Europa e a maioría do seu percorrido realízase por zonas boscosas con vexetación autóctona con presenza de animais silvestres que forman no seu conxunto un hábitat axeitado para o mantemento das poboacións de carrachas”. As mostraxes realizáronse durante os períodos de maior actividade das mesmas.

Podes consultar os mapas e o estudo nesta ligazón.