As datas máis sinaladas do Nadal de 2024 estiveron marcadas pola estabilidade: non houbo precipitacións, malia que as temperaturas foron baixas. Galicia experimenta agora un cambio drástico de tempo coa entrada do novo ano. Desaparece a influencia anticiclónica e entran en acción as baixas presións. De feito, a fin de semana de Reis estará marcada pola chegada dunha profunda borrasca atlántica que porá Galicia en alerta amarela polos refachos e as precipitacións. Está previsto que se rexistren ventos superiores aos 80 km/h no litoral e nas zonas altas, así como acumulados de precipitación —sobre todo na Coruña— que superen os 40 l/m2 en tan só 12 horas. A Costa da Morte e as Rías Baixas estarán en aviso laranxa por vento e ondas que poden acadar os 5 metros.
Fin de semana de gran inestabilidade
A inestabilidade comezou a asomar na madrugada deste venres pola proximidade das borrascas atlánticas a Galicia. Segundo Meteogalicia, está previsto que as precipitacións máis intensas se rexistren durante a xornada na fachada atlántica e na metade norte do territorio. De feito, o oeste e o suroeste da provincia da Coruña están en aviso amarelo por acumulados de precipitacións de ata 40 l/m2 en 12 horas. Tamén se activa a mesma alerta na Mariña lucense por refachos superiores aos 80 km/h. Na Costa da Morte acéndese o aviso por vento no mar con intervalos de forza 7.
Os días de maior inestabilidade da fin de semana serán o sábado e o domingo. Nas Rías Baixas e na Costa da Morte os avisos ascenden o día 4 a nivel laranxa por temporal marítimo e ventos de forza 8, así como ondas que poden acadar os 5 metros. Tamén se agardan fortes refachos de vento de ata 80 km/h no terzo norte, na franxa atlántica e en zonas altas de interior. Meteogalicia prognostica que as chuvias máis intensas se rexistren nas últimas horas do día.
Haberá cabalgatas de Reis?
O domingo 6 a situación será complicada en terra e en mar. O temporal previsto pon en risco as tradicionais cabalgatas de Reis que se celebran o 5 de xaneiro. Unha profunda borrasca situarase moi preto de Galicia e enviará frontes frías moi activas que regarán o territorio durante a mañá, con chuvias xeneralizadas, persistentes e intensas. O servizo meteorolóxico galego agarda que as precipitacións sexan máis intermitentes durante a tarde e que as temperaturas, ao igual que o resto da fin de semana, se manteñan sen cambios significativos.
A previsión de cara ao luns aínda é incerta pero a tendencia semella estar bastante clara: o tempo inestable será o protagonista do día de Reis. Meteogalicia non agarda cambios significativos no padrón do tempo de cara á vindeira semana, que estará dominada polas precipitacións. De feito, a súa previsión é que as probabilidades de chuvia estean nun 90% ata o xoves, baixando lixeiramente ao 85% o venres. As precipitacións máis cuantiosas rexistraranse nas comarcas atlánticas, as máis expostas á entrada das frontes.
