O episodio de altas temperaturas chega ao seu fin tras máis dunha semana por riba dos 20 graos, e con xornadas nas que varias localidades galegas chegaron a rexistrar as máximas en toda España. Esta situación anómala, moi por riba das medias do mes de marzo, provocou mesmo grandes incendios. Ademais, esta calor chegaba ao remate dun inverno especialmente cálido e seco no país.
Pero esta situación rematará a vindeira semana, coa entrada dunha grande masa de aire polar en Galicia, como consecuencia da retirada do anticiclón das Azores a latitudes máis meridionais no Atlántico e pola entrada dunha borrasca que afectará ao noroeste da península Ibérica.
A próxima semana (1-7 abril) en Galicia volverá ser claramente máis seca do normal. Tamén será máis fría do normal, sobre todo na provincia de Lugo pic.twitter.com/QJU3OcppFr
— AEMET_Galicia (@AEMET_Galicia) 29 de marzo de 2019
O resultado será unha caída xeralizada das temperaturas. Por exemplo, Santiago de Compostela disfruta este sábado de 21 graos de máxima, pero unha semana máis tarde o termómetro non subirá dos 11, segundo as predicións de Meteogalicia.
A caída das temperaturas vai materializarse este mesmo martes e será moi acusada cara á fin de semana, o primeiro do mes de abril, no que se espera que a neve volva caer nas montañas de Lugo.
Esta fin de semana poderemos despedirnos do tempo cálido, agás por algunhas tormentas no interior do país, provocadas polo aire frío que xa chega ás capas máis altas da atmosfera.
Así que, a partires da vindeira semana, poderemos esquecer os termómetros case propios do verán para volver abrigarnos porque volve o frío a Galicia.
