Imaxina xogar aos mellores pasatempos, pero en galego. A web Ludogal aparece como unha plataforma dixital independente centrada na creación de xogos en liña, combinando lecer, tecnoloxía, divulgación cultural e contido educativo, en colaboración con A Mesa pola Normalización Lingüística. Actualmente conta con catro xogos operativos: Pensatermos, Xeobusca, Verbagal e Xeogal, todos dispoñibles dende o móbil, a tablet ou o ordenador. Dende o equipo que impulsa a iniciativa pretenden lanzar novas dinámicas e ferramentas para promocionar o impulso do galego na rede de forma aberta, gratuíta e sinxela.
En primeiro lugar, o Pensatermos 2.0, o clásico reto diario de vocabulario que se basea nun rosco para tratar de atopar todas as palabras do dicionario que sexas capaz, que xa conta cunha ampla comunidade de xogadores. En segundo lugar, Verbagal é unha adaptación ao galego do famoso xogo de adiviñar palabras Wordle, con tan só seis intentos. En terceiro lugar, Xeogal é un desafío xeográfico diario no que os xogadores deben descubrir o concello galego agochado a través das pistas. Finalmente, XeoBusca permite explorar cinco localizacións galegas a pé de rúa a fin de atopar o sitio no mapa antes de que se esgote o tempo.
Colaboración coa comunidade educativa
Un dos piares fundamentais do proxecto é a súa orientación ao ámbito educativo. Dende o equipo de Ludogal amósase unha total disposición a colaborar con docentes, colexios e institutos para achegar estas ferramentas ás aulas, ofrecendo un recurso didáctico, dinámico e divertido para reforzar o vocabulario, a ortografía e a xeografía galega entre o estudantado. Ademais, a plataforma xa conta con perfís activos en redes sociais como Instagram e Bluesky, onde se compartirá a actualidade do proxecto, novidades e os retos diarios para interactuar coa comunidade.
Podes acceder a Ludogal na seguinte ligazón.
