A última vez que se rexistrou neve en cotas baixas en Galicia foi en 2023, cando unhas temperaturas excepcionalmente baixas permitiron que as precipitacións se solidificasen a niveis pouco habituais. Esta situación podería repetirse o venres 23 de xaneiro, xa que, segundo os modelos meteorolóxicos de MeteoGalicia, a cota de neve baixará ata os 300-400 metros. Tras unha sucesión de invernos moi cálidos, trátase dun escenario pouco frecuente.
Segundo explican dende o servizo meteorolóxico, a borrasca Ingrid, que se formou como unha cicloxénese explosiva, será a responsable da entrada de aire frío, cun descenso térmico moi acusado pola presenza dun centro de baixas presións situado ao sur de Irlanda. Este sistema favorecerá a aparición de neve a partir da noite do xoves e durante a xornada do venres.
O interior das provincias da Coruña e Pontevedra, así como Lugo e Ourense, veranse afectadas por nevadas por enriba dos 300 ou 400 metros. Deste xeito, en localidades onde non é habitual este fenómeno, como Melide, podería aparecer o manto branco. Zonas elevadas do concello de Melide, áreas como o concello de Dozón, ou o monte Pedroso, nas inmediacións de Santiago de Compostela, poderían ser testemuñas das nevadas. Ademais, dende Meteored sinalan que nos principais cumios do Macizo Galaico-Leonés poderían acumularse máis de 60 ou 70 centímetros de neve, puntualmente incluso máis.
Con todo, trátanse aínda de datos provisionais, baseados en previsións a tres días vista. Como lembran os técnicos de MeteoGalicia, estamos ante un episodio moi rápido, asociado á entrada dunha masa de aire frío tras o paso dunha fronte: a cota situarase entre os 1.100 e 1.400 metros o xoves, descenderá de maneira abrupta o venres e volverá subir durante o sábado.
