As borrascas Gerard e Fien provocarán que toda Galicia estea este martes en risco importante ou risco extremo por vento, fenómenos costeiros, neve ou choivas, segundo vén de informar a Axencia Estatal de Meteoroloxía (AEMET).
A Dirección Xeral de Emerxencias e Interior da Vicepresidencia Segunda da Xunta de Galicia vén de activar unha alerta vermella por temporal costeiro no litoral da provincia da Coruña. Segundo a AEMET, o fenómeno meteorolóxico adverso de nivel vermello comezará a media tarde da xornada deste martesna costa oeste e noroeste da Coruña.
Agárdase mar combinado do noroeste con ondas de ata nove metros. Cómpre lembrar que xa na xornada de este luns rexistráronse en todo o litoral galego un fenómeno meteorolóxico de nivel laranxa que continuará hoxe con ondas de ata 8 metros.
A alerta por temporal costeiro súmase á laranxa por nevaradas que xa foi tamén activada para mañá nas zonas de montaña das provincias de Lugo e Ourense, e á amarela no interior da Coruña; na Mariña lucense e no centro e sur de Lugo; nas zonas do noroeste, sur e Valdeorras e no interior da provincia de Pontevedra. Por este motivo, lémbrase que se suspende o transporte escolar toda a xornada do martes nas montañas de Lugo e Ourense e durante a tarde nas zonas do interior da Coruña, interior de Pontevedra, centro de Lugo, sur de Lugo, noroeste de Ourense, sur de Ourense e Valdeorras
O temporal de vento e choiva, que deixou este luns case 250 incidencias en Galicia, empeorará este martes coa caída prevista das temperaturas e o descenso da cota de neve até situarse, conforme avance a xornada, en 300 metros.