As montañas de Lugo e Ourense quedaron cubertas de neve a pasada fin de semana, despois de que unha forte borrasca trouxese unha masa de aire polar que provocou o descenso da cota de neve ata os 600 metros. Puntos do territorio, como o concello lucense de Pedrafita do Cebreiro, espertaron estes días cubertos dun espeso manto branco. Malia que durante o comezo da semana non se agarda neve, debido á influencia das altas presións sobre Galicia, a chuvia, a sarabia e o aire frío volverán a azoutar o territorio a partir deste xoves.
Unha potente borrasca situada ao norte das Illas Británicas enviará unha fronte fría a Galicia que fará descender as cotas de neve entre os 900 e os 1.000 metros. Producirase un descenso notable das temperaturas, con mínimas que marcarán os 4 graos e máximas que non superarán os 10. Durante a fin de semana, outra borrasca azoutará Galicia en condicións semellantes, dado que provocará precipitacións, algunhas delas en forma de neve e xeadas asociadas aos espisodios de ventos do norte.
