Galicia comeza a segunda semana de decembro con alerta amarela por neve nas montañas de Lugo, por ondas de máis de catro metros entre a Costa da Morte e a Mariña lucense e por mar de vento de forza 7 na mesma zona. A inestabilidade no litoral norte de Galicia débese aos restos da borrasca Darragh, mais a neve e o frío serán protagonistas durante toda a semana. Catorce concellos lucenses estarán en alerta amarela este luns por acumulacións de neve superiores aos cinco centímetros. Son A Fonsagrada, Negueira de Muñiz, Navia de Suarna, Cervantes, Ribeira de Piquín, Baleira, Becerreá, As Nogais, Triacastela, Pedrafita do Cebreiro, Samos, O Incio, Folgoso do Courel e Baralla.
O responsable destas primeiras nevaradas da tempada en Galicia é o vento do nordés, que favorece a chegada dunha masa de aire frío procedente do interior de Europa. O anticiclón situado sobre as Illas Británicas propicia esta situación, con máximas que non superarán os 13 graos este luns en ningunha cidade galega e con mínimas que oscilarán entre os 3 e os 7 agás en Ferrol e A Coruña, que acadarán os 9 e os 10 graos respectivamente. Durante esta xornada a cota de neve situarase entre os 900 e os 1.000 metros, mais subirá entre os 1.000 e os 1.100 durante a tarde.
Tempo estable, pero frío
Meteogalicia desactivará as alertas por mar de vento e ondas na tarde deste luns e o aviso por neve estará activo ata a madrugada. Durante a xornada do martes a situación será semellante, mais sen alertas. A cota de neve estará situada nos 1.000 metros porque o vento do nordés continuará traendo aire polar a Galicia, propiciado polas altas presións sobre as Illas Británicas. De feito, as temperaturas non experimentarán cambios significativos. A atención do martes está posta nas néboas, que serán “localmente persistentes” en comarcas do interior.
No que respecta ao mércores, a situación non experimentará cambios. Seguirá predominando o tempo estable e as temperaturas frías. De feito, as mínimas descenderán aínda máis, malia que as máximas manteranse sen cambios significativos. Na segunda metade da semana tampouco se producirán grandes cambios na configuración atmosférica. Segundo prognostican dende Meteogalicia continuarán predominando os ventos do leste, polo que a probabilidade de precipitación será baixa. As temperaturas manteranse en valores propios para esta época do ano, con máximas que roldarán entre os 11 e os 10 graos e con mínimas que non subirán de 5.
