Hai unha semana, a calixe procedente do Sáhara, en forma de po en suspensión, xa ameazaba con alcanzar Galicia. Agora, os datos dos modelos europeos confirman a chegada destas masas de aire africano como explicación aos ceos turbios do mércores 4 de marzo na comunidade. A información facilitada polo programa europeo Copernicus e difundida por MeteoGalicia a través do seu perfil de X constata a presenza de partículas en suspensión (PM) sobre o territorio galego. Esta situación manterase, cando menos, ata o mediodía do xoves. Durante este período podería rexistrarse un aumento das concentracións de partículas (PM) en superficie, o que pode afectar á calidade do aire, especialmente nas zonas máis expostas.
A predición publicada polo Ministerio para a Transición Ecolóxica e o Reto Demográfico tamén advirte da intrusión destas masas de aire africana. Os modelos estiman concentracións de entre 5 e 200 µg/m3 no nororoeste, norte e nordeste peninsular. Segundo o modelo SKIRON, especializado no seguimento do po sahariano, podería producirse ademais deposición húmida en Galicia ao longo do día, é dicir, precipitacións que arrastren o po en suspensión e dean lugar a episodios de chuvia con barro. Precisamente, a súa chegada está prevista para mañá, con aviso amarelo no norte da Coruña e na Mariña lucense, segundo MeteoGalicia.
Con todo, ao longo da xornada do xoves comezará unha diminución progresiva das concentracións. Os modelos do Copernicus Atmosphere Monitoring Service (CAMS) prevén valores máis baixos, de entre 5 e 75 µg/m3 para o sueste, noroeste e norte peninsular, e cara ao mediodia a nube de po africano iniciará a súa retirada do noroeste galego.
