A calixe procedente do Sáhara en forma de po en suspensión poderá chegar a Galicia este martes 24 de febreiro. Isto é o que amosa o mapa compartido pola Axencia Estatal de Meteoroloxía (AEMET) no seu perfil de X con datos do modelo Copernicus, un suceso confirmado tamén por MeteoGalicia. Esta masa de po e area moi fina xa afecta ás Illas Canarias e trasladarase cara á península a través do vento durante a madrugada do martes, como informan dende ElTiempo.es.
Os técnicos do servizo meteorolóxico galego indican que a nube sahariana comezará no suroeste peninsular, con especial incidencia sobre Andalucía, Extremadura e o sur de Portugal. En Galicia entrará polo sur da comunidade e afectará ás zonas do centro e leste, principalmente á provincia de Ourense e o sur de Lugo. Esta tendencia pódese ver no mapa da AEMET, onde Pontevedra e A Coruña apenas recibirán as consecuencias da calixe. A partir do mércores, o po sahariano estenderase o po cara ao centro da península.
Con todo, a concentración de partículas en suspensión será reducida e oscilará entre as 0,1 e 0,2 micras. Estas cifras implican un ceo non moi alaranxado, polo que os efectos notaríanse moi pouco na comunidade. Cando chega con forza, a calixe pode reducir a visibilidade e deixar un ton amarelo e vermello no ceo, cunha pegada en superficies como as carrocerías dos coches.
