O mes de marzo foi moi cálido e moi seco en Galicia, segundo o avance do último informe climatolóxico elaborado por MeteoGalicia. En xeral, as temperaturas foron elevadas para esta época, tanto nos valores mínimos ou máximos debido á situación anticiclónica rexistrada na segunda quincena do mes. Pola súa banda, as precipitacións quedaron por debaixo do agardado, xa que as frontes da primeira quincena non foron moi activas e, a partir do día 15, apenas se rexistraron chuvias, quedando a situación en Galicia dominada polas altas presións e a estabilidade.
Temperaturas por riba do habitual
A temperatura media en marzo foi de 11,8 graos, o que supón nove décimas por riba do valor normal climatolóxico, segundo os datos rexistrados en once estacións meteorolóxicas representativas. En concreto, a media da temperatura mínima foi de 6,5 graos e a da máxima foi de 17 graos. As temperaturas máis altas —entre os 18,6 e 20,1 graos— rexistráronse en áreas do Miño de Ourense e do val do río Tea, mentres que as máis baixas —entre 0,8 e 2,2 graos— déronse nas serras da Queixa, Calva e do Larouco, na provincia de Ourense.
35 litros por metro cadrado
As precipitacións acumuladas en Galicia no mez de marzo rexistraron unha media para a serie histórica 1961-2026 de 35 litros por metro cadrado. Segundo datos rexistrados en 16 estacións meteorolóxicas representativas, é unha cifra un 65% inferior aos valores climáticos normais. De feito, foi o oitavo marzo máis seco desde que hai rexistros. Os acumulados máis altos, con datos entre 80 e algo máis de 100 litros por metro cadrado, rexistráronse no extremo oeste da provincia da Coruña e a menor cantidade de precipitación deuse nas depresións de Lemos e de Ourense, inferior aos 20 litros por metro cadrado.
