A falta de sete días para a Noiteboa, os fogares galegos xa comezan a preparar os seus menús, os agasallos xa están pensados —ou se cadra mercados— e as celebracións planificadas. Pero que vestimenta será precisa? Que tempo vén para o Nadal? As previsións apuntan a que as baixas temperaturas serán as protagonistas nas xornadas festivas e que Galicia logrará sortear a chuvia.
“A pesar de que hai uns días semellaba que viría unha masa de aire bastante frío cara a Galicia pola Noiteboa, agora case se pode asegurar que un anticiclón afectará o territorio. Teremos ventos do nordés e un tempo seco sen case precipitacións“, asegura o catedrático de Física da Universidade de Santiago (USC) Gonzalo Míguez Macho. Así tamén o predí Meteogalicia.
Segundo a axencia meteorolóxica galega, a partir da fin de semana e de cara ao día de Nadal, Galicia recupera a influencia das altas presións, con ventos de compoñente norte e baixa probabilidade de chuvia en xeral, “agás na metade norte onde algunha fronte pouco activa pode deixar algunha precipitación feble”. Pero, e de cara ao resto do inverno, que tempo virá?
Predicións de inverno
Saber o tempo que afectará a unha zona concreta máis aló de tres, cinco ou dez días é “algo moi complicado, porque a atmosfera pode cambiar en calquera momento”, indica Míguez. Malia isto, a Axencia Estatal de Meteoroloxía (AEMET) vén de publicar un informe cos datos de temperaturas e precipitacións que se deron durante os pasados meses de setembro, outubro e novembro. No mesmo documento tamén se inclúe un pequeno prognóstico estacional do que podería ser o clima na península durante o inverno.
Este resumo climático reflicte a tendencia á alza da media dos termómetros que seguirá na mesma liña de cara á próxima estación: “Semella un clásico, pero é así en tódalas predicións”, apunta o portavoz da Aemet Rubén del Campo. “Pero isto hai que collelo con pinzas porque son modelos a longo prazo e con moita variedade de probabilidade”, advirte o catedrático da USC.
Coa chegada do inverno meteorolóxico, que deu comezo o pasado 1 de decembro, a AEMET publicou unha previsión estacional para o trimestre de xaneiro, febreiro e marzo, que coincide aproximadamente coa estación astronómica, que se iniciará o próximo día 21 ás 10.21 horas. Estes datos baséanse en información probable sobre tendencias xerais das temperaturas e precipitacións. É dicir, non predí fenómenos como vagas de frío ou temporais, senón que tenta prognosticar como poden ser os padróns da climatoloxía nestes meses.
Temperaturas superiores ao normal
Así, a axencia estatal sinala que o escenario máis probable —entre un 40 e 70%— é o de temperaturas superiores ao normal en todo o país e menos precipitacións do habitual —entre un 40 e 50%— nesta estación. Con todo, o catedrático da USC matiza que estes prognósticos baséanse nos padróns meteorolóxicos a grande escala, polo que “tentar predicir a máis de tres semanas vista é algo moi complicado, porque o tempo pode cambiar en calquera momento”.
Con respecto ao aumento dos termómetros, Míguez destaca que é algo lóxico debido ao quecemento global. “Os ventos do norte, que normalmente veñen acompañados de moito frío, xa comezan a ser máis cálidos”, advirte.
“Débese ter en conta que a atmosfera é un mecanismo de reloxería no que cada ‘rodiña’ vese influenciada do que faga o resto, por iso, o que poida pasar en lugares como o Pacífico terá a súa consecuencia en Galicia”, explica Míguez. Sobre isto, o catedrático apunta que o tempo en inverno no noso territorio “semella que seguirá uns padróns cambiantes”.
En cuanto a la predicción estacional para el invierno meteorológico (trimestre compuesto por diciembre, enero y febrero), lo más probable es que, en conjunto, sea más cálido de lo normal en todo el país, sobre todo en zonas costeras y los archipiélagos. pic.twitter.com/kjGUigqrG6
— AEMET (@AEMET_Esp) December 12, 2024
Inverno en Galicia
Neste sentido o catedrático afonda neste fenómenos que poden afectar á comunidade. Un padrón no que predomina o paso das borrascas de leste a oeste “o que vai traer é chuvia constante, vento, temporais e unha temperatura que non vai ser especialmente fría”.
Pola contra, cando existe un predominio de correntes de aire que veñen do norte e do interior do continente europeo, “teremos un padrón de temperatura moito máis frío e seco, xa que os ventos do nordés non tenden a producir chuvia en Galicia”, matiza.
Con todo, o catedrático —“tendo en conta a inercia destes últimos dous meses”— apunta a que este inverno o tempo virá moi cambiante. “Non será como o ano pasado que encadeamos temporais un detrás doutro, senón que vai ir variando. Pero isto podería mudar dentro de tres ou catro semanas e que de súpeto apareza unha dinámica de chuvias continuas das que non damos saído”, conclúe.
