Ventos moi intensos, acusado descenso térmico e chuvia. Ese é o escenario que vivirá Galicia a partir deste mércores. A responsable de romper a estabilidade é unha profunda borrasca que se xerará no centro do Atlántico Norte e que se desprazará rapidamente cara ao noroeste peninsular ata situarse sobre os Alpes. Os seus efectos máis pronunciados serán os fortes refachos de vento que poderán superar os 80 km/h. De feito, a Axencia Estatal de Meteoroloxía (AEMET) pide manter a precaución durante o mércores e o xoves polas ramas ou obxectos que se poidan desprender das zonas altas. O venres xa será un día de relativa estabilidade, mais as chuvias regresarán a Galicia durante a fin de semana e con maior intensidade.
O mércores será un día marcado pola humidade, dado que o territorio galego estará situado nunha situación intermedia entre as baixas e as altas presións. Serán os ventos do oeste os encargados de alimentar as precipitacións, que serán ocasionais e, sobre todo, máis probables no norte e no oeste. O vento irá adquirindo forza conforme avance a xornada e haberá refachos intensos no extremo norte nas últimas horas do día.
A borrasca azoutará con forza durante o xoves
O episodio continuará o xoves, cando a borrasca procedente do Atlántico Norte se sitúe preto do litoral galego. Segundo trasladan dende Meteogalicia, unha fronte fría derivada das baixas presións atravesará Galicia de norte a sur durante a segunda parte da xornada. Polo tanto, as chuvias serán máis intensas durante a tarde. Un dos efectos máis notables será o brusco descenso térmico. Se durante a pasada semana as temperaturas estiveron por enriba dos 20 graos, con valores anómalos para esta época do ano, a partir deste xoves as máximas oscilarán entre os 14 e os 17 graos. Amais disto, Meteogalicia alerta dos fortes refachos de vento, que serán superiores aos 80 km/h, no litoral norte e nas zonas de alta montaña de Lugo e Ourense.
A borrasca atlántica abandonará Galicia e deixará un venres marcado pola estabilidade debida á influencia dun anticiclón centrado no Algarve. Con todo, segundo informa Meteogalicia, durante a tarde aumentarán as probabilidades de precipitación e as temperaturas manteranse sen grandes cambios. No que respecta ao resto da fin de semana, a probabilidade de precipitación será moi elevada e sitúase para sábado e domingo no 90%. Estará acompañada de temperaturas frescas, pero propias para esta época do ano. Agárdase unha nova fronte fría o domingo que, segundo o portal Meteored, podería provocar un forte baixón térmico en Galicia. A responsable sería unha borrasca cuxo centro de acción estará sobre as illas británicas.
