A escasos días de comezar o outono, Galicia encadea a inestabilidade atmosférica con xornadas de transición e ceos despexados. As altas temperaturas do verán van quedando atrás e en menos dunha semana e tralo paso dunha borrasca fría illada, o país volve encarar unha segunda fronte. Este luns o clima estará influenciado pola entrada dun anticiclón que estará activo ata o mércores, cando volve entrar unha borrasca fría que deixará chuvascos en todo o país. Esta inestabilidade atmosférica nace dos restos do ciclón tropical Margot, que, aínda que foi perdendo forza co tempo, na actualidade viaxa polo Atlántico e alimenta os fenómenos meteorolóxicos.
A predición para esta semana en Galicia é cambiante. Segundo apuntan dende MeteoGalicia, “todo pode mudar no último momento”. A fronte fría descargará abundantes precipitacións, sendo as últimas horas do mércores as máis intensas. Nestes momentos está activa a alerta amarela por ventos e precipitacións na Coruña, A Mariña de Lugo, Rías Baixas e no Miño de Pontevedra.
O xoves 21 de setembro choverá, pero “dentro da normalidade”, sosteñen dende o organismo. E a partir da fin da semana, todo apunta á entrada dun novo un anticiclón. De maneira que o outono pode empezar con temperaturas por enriba dos 20 graos, e incluso chegar aos 26 nas Rías Baixas de cara a vindeira semana.
Outono con sabor a verán
No resto de España, unha nova DINA (Depresión Illada en Niveis Altos) afectará á franxa mediterránea peninsular e ás Illas Baleares o martes e mércores. Ademais, estas precipitacións de forte intensidade poderán ir acompañadas de tormenta e refachos de vento moi agudos. Segundo explica a Axencia Estatal de Meteoroloxía (AEMET), a fronte atlántica que entra o mércores —ademais da DINA— ao mediodía “varrerá o interior peninsular de oeste a este con precipitacións máis débiles”. A partir do xoves, a fronte desprazarase cara ao este, deixando chuvascos débiles na meirande parte da península, agás no Mediterráneo. A fin de semana recuperaranse as altas presións e todo apunta a que o outono vai comezar con sabor a verán.
