O Centro Nacional de Furacáns de Estados Unidos (NHC, polas súas siglas en inglés) acaba de declarar como furacán a tormenta tropical Margot, que está a desprazarse polas augas do Atlántico. O sistema está ascendendo en latitudes mentres se vai fortalecendo e, de feito, está previsto que se sitúe ao oeste dos Azores esta fin de semana ou a principios da que vén. Segundo informan dende o NHC, nestes momentos está a rexistrar refachos de vento de 130 km/h e non se descarta que se fortaleza aínda máis nas próximas 48 horas. Malia que de momento non hai un ningún risco de que afecte a terra, este escenario cambiará conforme se achegue aos Azores. Diferentes servizos de meteoroloxía, alertando da incerteza á que sempre está sometido o prognóstico do tempo, cren que podería converterse nunha borrasca e afectar a Galicia de cara á fin de semana ou nos primeiros días da que vén.
Dende o portal meteorolóxico eltiempo.es informan que, de momento, “o furacán Margot non supón unha ameaza para España e parece improbable que este escenario puidera ocorrer”. En todo caso, o prognóstico que colle máis forza é que os restos deste furacán, xa debilitado, afecten a península e, en primeiro lugar, a Galicia. Pero este fenómeno adverso non será o único responsable de que a inestabilidade continúe no noroeste peninsular dende que comezou setembro. Ao longo de toda esta semana, novas borrascas atlánticas con aire frío en altura volverán deixar chuvia e tormentas en Galicia e noutras partes do Estado, segundo a previsión de eltiempo.es.
A posible entrada doutra DANA
De feito, máis alá dos restos do furacán Margot, o meteorólogo Roberto Granda advirte nun artigo publicado en eltiempo.es da posibilidade de que esta fin de semana tamén nos afecte unha DANA (Depresión Illada en Niveis Altos), o que provocaría máis chuvias e unha baixada acusada das temperaturas. “De cara ao venres, unha vaguada colocaríase no oeste peninsular. É moi probable que durante este día e o sábado, un embolsamento frío en capas medias altas se desvolge no seno de dita vaguada“, expón no seu artigo. De momento, a incerteza a tantos días vista non permite afinar máis o prognóstico, que varían entre a influencia dunha DANA ou dunha borrasca. O que si parece firme é que a partir do venres a inestabilidade aumentará en toda a península, incluída Galicia, independentemente do fenómeno que nos afecte.
Dende Meteogalicia confirman que as xornadas deste mércores e xoves estarán marcadas pola influencia anticiclónica e, por tanto, polas altas temperaturas e os ceos despexados en case todo o país, agás algunhas zonas da montaña ourensá ou do leste, nas que se producirán chuvascos illados. Porén, o cambio drástico de tempo comezará a experimentarse a partir do venres, cando entrarán os embolsamentos de aire frío en altura e, previsiblemente, os restos do furacán Margot. Así, a probabilidade de precipitación vai ser alta en todo o país durante o sábado e o domingo e virá acompañada dun descenso das temperaturas.
DANA sería DINA en galego, atendendo ás palabras qe compñen este acrónimo qe tan ben explicades vós, depresion illada en niveis altos.