O furacán Gabrielle, activo dende o pasado luns, atópase xa no leste das Azores como furacán de categoría 1. Trátase do nivel máis baixo na Escala de Ventos de Furacáns de Saffir-Simpson, polo que non adoita provocar unha destrución masiva, aínda que pode rexistrar ventos sostidos entre os 119 e 153 km/h. Inicialmente parecía dirixirse cara a Galicia, mais dende MeteoGalicia sinalan que o escenario máis probable é que finalmente evite o territorio galego.
Aínda que na actualidade segue cualificado como un furacán, Roberto Granda explica en ElTiempo.es que as imaxes satelitais amosan a ausencia dun ollo definido e unha estrutura en transformación, debido á cizalladura do vento. Engade que, xuntos coas augas máis frías, estes serán os factores clave no proceso de debilitamento de Gabrielle.
“Vaise ir desprazando e o sábado chegará ao oeste da península ibérica”, apunta un técnico do servizo meteorolóxico galego. Pola súa parte, o doutor en Física e investigador da Axencia Estatal de Meteoroloxía, Juan Jesús González Alemán, lembra no seu perfil de X que o Centro Nacional de Furacáns inclúe o noroeste peninsular no seu cono de traxectoria. Con todo, prevé que tras o seu paso polas Azores o sistema experimente unha transición extratropical, converténdose nunha borrasca pos-tropical, aínda que está por determinar con que intensidade.
Efectos indirectos en Galicia
Segundo MeteoGalicia, Gabrielle entrará pola zona de Lisboa e desprazándose despois cara ao Golfo de Cádiz, sen afectar directamente a Galicia. Algúns escenarios apuntan a que a borrasca Ex-Gabrielle podería penetrar máis ao norte e achegarse á costa portuguesa antes de avanzar ao interior peninsular. Porén, o máis probable é que acceda a través da capital lusa.
Os efectos indirectos que o antigo furacán podería deixar en Galicia serían limitados: o sábado prevese precipitacións, sobre todo no suroeste da comunidade, asociada ás bandas do ciclón, así como ventos de suroeste que se farán notar especialmente no litoral de Pontevedra. Ademais, poderanse rexistrar ondas de ata catro metros. A súa entrada no Golfo de Cádiz favorecerá que o domingo Galicia viva unha xornada seca, incluso con ceos despexados.
Dende MeteoGalicia insisten en que este é o escenario máis probable para a evolución de Gabrielle no seu paso pola península. “Tería que cambiar moito para que entrase máis ao norte”, conclúe un técnico do servizo meteorolóxico galego.
