Unha multitudinaria extracción da planta uña de gato e seis talleres experimentais dirixidos polo grupo UDCiencia da Universidade da Coruña, foron as actividades principais da xornada divulgativa e de sensibilización que organizou esta fin de semana o Aquarium Finisterrae, dos Museos Científicos Coruñeses.
A iniciativa forma parte da campaña Stop Comercio Invasoras, un dos instrumentos cos que o proxecto europeo Life Invasaqua no que participa o Aquarium, quere reducir esta problemática que atopa poucos obstáculos, sobre todo no comercio en liña.
A uña de gato surafricana ou Carpobrotus edulis, as mimosas, as vespas asiáticas e ata uns vermes exóticos coreanos empregados na pesca deportiva, son algunhas das especies invasoras que ameazan a nosa flora e a nosa fauna.
