Galicia quedará entre o mércores e o próximo sábado baixo a influencia dun anticiclón que se localizará no norte da Península Ibérica. Desde esa posición achegará estabilidade, deixando ceos despexados e aproximará aire cálido de orixe norteafricano, o que ocasionará un importante incremento nas temperaturas diúrnas. É por iso que dende MeteoSalud e MeteoGalicia declara para o xoves 3 de setembro a alerta vermella por episodio de calor no interior de Pontevedra.
Os valores máis elevados espéranse durante as tardes do xoves e do venres. O sábado aínda será un día caloroso, pero probablemente con nubes e algunhas tormentas no interior que farían descender lixeiramente as temperaturas e estes valores tenderían xa a normalizarse o domingo.
Ademais, a Xunta de Galicia, a través da Secretaría Xeral para o Deporte, recomenda non practicalo na zona en alerta vermella entre as 13:00 e 17:00 horas, salvo no caso dos deportes náuticos e acuáticos. Asemade, tanto no caso de alerta vermella como laranxa —centro de Lugo, interior da Coruña e montaña de Ourense—, recoméndase á organización das probas que adapte os horarios da práctica deportiva ás condicións específicas de cada zona, tomando as medidas preventivas necesarias para minimizar o impacto das altas temperaturas na saúde. Os organizadores deberán garantir a protección dos deportistas e do público que asiste ás probas.
