O Tribunal Superior de Xustiza de Galicia (TSXG) suspende de forma cautelar a resolución da Xunta pola que se determinou o réxime de xestión do lobo na tempada 2024/2025 e se permitía a súa caza. Os xuíces entenden que a súa posta en práctica podería afectar a viabilidade das poboacións, tras un recurso presentado por WWF Adena.
A Sala, que aplicou o principio de precaución ambiental, explica no auto que na adopción das medidas de xestión que se contemplan na resolución, está “o control dos lobos coa fin de previr e paliar os danos á gandería”. Con todo, fai un balance preliminar sobre os prexuízos que pode ter esta medida provisional, por un lado sobre a gandaría e por outro sobre o lobo. Desde o TSXG destacan que sobre os danos á gandería non se ofrece información nin cuantitativa nin cualitativa suficiente. Ademais destaca que, de ocorrer, non serían reversibles pero si indemnizables.
Con base na xurisprudencia europea
O alto tribunal galego lembra na resolución que a medida cautelar se refire ao réxime de xestión do lobo na tempada 2024/2025. O réxime de caza doutras especies e a súa protección, aínda regulado total ou parcialmente pola Resolución do 27 de marzo de 2024 é alleo ao presente litixio. Os maxistrados advirten que esta medida cautelar “non pode anticipar o sentido da resolución final”.
No auto, o alto tribunal lembra que, conforme á xurisprudencia de resolucións da Unión Europea, que se impón o principio de precaución tanto na área concernida pola resolución como na avaliación extensa, que integra a áreas limítrofes. “Pero tendo que ser favorable o estado das poboacións en ambos os escenarios e non só nun deles”, engade. Ademais, indica que ante a provisionalidade inherente e a falta de probas actuais, existen indicios consistentes, coas mesmas limitacións probatorias, dunha cualificación desfavorable respecto do estado das poboacións. Por tanto, o TSXG accedeu á medida cautelar solicitada por WWF-ADENA.
Reacción da Xunta
Desde a administración autonómica “lamentan” non poder tomar medidas de control contra o lobo. Aínda que os servizos xurídicos da Xunta están a revisar xa o caso, aseguran que as poboacións deste animal aumentaron de 84 a 93 e que xa está presente en máis do 90% do territorio galego. O tribunal considera que non pode corroborar de forma probada esta visión positiva da Xunta sobre a situación dos lobos.
A conselleira de Medio Ambiente e Cambio Climático, Ángeles Vázquez, alertou das posibles consecuencias para o sector agrogandeiro galego. Ademais, cre que a falta de medidas de control fronte á presenza do lobo significará que terán que solicitar axudas para compensar os danos cando se produzan. Mentres tanto, aplicarán as medidas de prevención establecidas previamente.
