Un estudo realizado polo Instituto Español de Oceanografía (IEO, CSIC), en colaboración co Instituto de Ciencias Mariñas de Andalucía (ICMAN-CSIC), analizou como o quecemento do océano está a influír na talla á que a pescada europea (Merluccius merluccius) alcanza a madurez sexual, isto é, a talla a partir da cal os individuos comezan a reproducirse. Este parámetro é clave para comprender a dinámica das súas poboacións e garantir a súa sustentabilidade.
Apoiado en case un século de series históricas, o traballo mostra unha correlación inversa e estatisticamente significativa entre a temperatura da auga e a talla de madurez: a maior temperatura, menor talla á que os individuos comezan a reproducirse.
Os resultados evidencian un claro patrón bioxeográfico. No Atlántico Norte (augas frías), a pescada alcanza a madurez cun tamaño de 53,4 centímetros; no Atlántico Sur (augas tépedas), esta redúcese a 40,1, mentres que no Mediterráneo (augas máis cálidas) a madurez alcánzase a unha talla aínda menor, de 30,9 centímetros. O estudo confirma tamén un marcado dimorfismo sexual: os machos alcanzan a madurez a tallas menores que as femias, un aspecto relevante para a avaliación do potencial reprodutivo das poboacións.
Efectos do cambio climático
Baixo os escenarios de cambio climático analizados, as proxeccións indican que a talla de madurez da pescada europea podería diminuír, na maioría das áreas de distribución, entre 4 e 9 centímetros cara a finais de século, con reducións especialmente acusadas nas áreas do Atlántico.
Esta redución proxectada “subliña a urxente necesidade de poñer en funcionamento estratexias de xestión pesqueira adaptativas que aborden os efectos do cambio climático nos ecosistemas e stocks mariños”, sinala David José Nachón, investigador que realizou o traballo no Centro Oceanográfico do Vigo do IEO e autor principal do artigo. Ademais, continúa, “as implicacións deste estudo non se limitan á pescada europea, senón que poderían afectar tamén a outras especies demersais, que poderían experimentar unha redución similar na súa talla de madurez nun contexto de quecemento do océano”.
Para a realización deste estudo recompilouse unha extensa base de datos histórica (1925-2021) de rexistros de talla de madurez da pescada europea, abarcando un amplo rango xeográfico e na que se integraron os datos de temperatura da auga correspondentes.
Referencia: Forecasting size-at-maturity shifts under global warming: A case study on European hake, a widely distributed species (Publicado en Rev Fish Biol Fisheries)
