A historia da pescada é unha viaxe evolutiva que nos leva a un antepasado común a todas as súas variedades, que era un peixe que vivía hai 30 millóns de anos no que hoxe sería o mar en Groenlandia. Científicos do IEO, en colaboración coa Universidade de Vigo, a Universidade Autónoma de Barcelona e o Instituto de Ciencias do Mar de Barcelona ( ICM-CSIC), levaron a cabo unha análise xenética de 1.205 exemplares de pescadas de todo o mundo que lles permitiu reconstruír a historia evolutiva deste xénero de peces e suxire a orixe híbrida de varios morfotipos raros.
Os fósiles de pescada máis antigos datan do oligoceno medio, fai uns 30 millóns de anos, cando empezaron a aparecer ecosistemas parecidos aos actuais. As análises xenéticas sinalan que a pescada norteamericana (Merluccius bilinearis) é a máis antiga do xénero. Esta debeu estenderse desde Groenlandia cara ao sur, a través dun océano Atlántico aínda incipiente, ata alcanzar o océano Pacífico.
A especie ancestral de Merluccius dividiuse en dúas grandes liñaxes denominados no estudo como vello e novo mundo, que se formaron por mor da expansión xeolóxica do océano Atlántico. Eventos xeolóxicos posteriores, como o peche da vía marítima de Panamá fai 3,5 millóns de anos, actuaron como barreira xeográfica entre as dúas liñaxes e favoreceron a especiación.
Este novo traballo, publicado na revista Scientific Reports, suxire unha orixe común para os 14 especímenes representantes de nove morfotipos de pescada raros do Pacífico Sur e o Atlántico Sur.
“Semella que a hibridación é recorrente en rexións adxacentes e de superposición polo que aínda poden atoparse novos morfotipos raros”, explica Montse Pérez, investigadora do Centro Oceanográfico de Vigo e primeira autora do traballo. “É un fito conseguir esta información a partir de mostras fixadas de museo, aínda que aínda existen lagoas de coñecemento na taxonomía da pescada”, conclúe a científica.
Referencia: Pérez, M., Fernández-Míguez, M., Matallanas, J. et al. Phylogenetic prospecting for cryptic species of the genus Merluccius (Actinopterygii: Merlucciidae). Sci Rep 11, 5929 (2021)
