Bota crema solar, evita a exposición ao sol nas horas centrais do día e hidrátate ben. Eses son tres dos consellos fundamentais para o comezo desta semana abafante. A chegada dunha masa de aire cálido procedente do norte de África está a provocar un significativo aumento dos termómetros e obriga a activar alertas por altas temperaturas na meirande parte de Galicia. De feito, as zonas próximas ao Miño das provincias de Ourense e Pontevedra rodarán —e incluso poderán superar— os 40 graos entre martes e mércores. A partir do xoves manterase a calor, quizais cunha lixeira baixada das temperaturas. Non obstante, o cambio máis significativo serán as treboadas, máis probables no interior e durante a tarde.
A masa de aire norteafricana entra este luns, cando os valores comecen a ascender progresivamente e xa se acadarán os 30 graos en moitos puntos de Galicia. En Ourense, por exemplo, as máximas chegarán aos 37 graos. En Santiago e Vigo quedarán en 31 e en Pontevedra en 34. No resto de cidades galegas estarán por enriba dos 25. As elevadas temperaturas, sobre todo as do sur de Galicia, activan a alerta amarela entre as 15 e as 21 horas no Miño de Pontevedra e de Ourense. Tamén está acendido o aviso por vento na Costa da Morte e no mar entre Ferrol e Ortegal.
Alivio térmico a partir do xoves
Os días máis cálidos da semana serán martes e mércores. O anticiclón situado ao norte da península ibérica favorecerá a chegada de aire africano que aumentará aínda máis as temperaturas. A única zona de Galicia con alivio térmico será a Mariña lucense. No resto do territorio acadaranse facilmente os 35 graos e a alerta no Miño de Pontevedra e Ourense ascende a laranxa porque se poderán superar os 40. O aviso amarelo por calor estará acendido no litoral de Pontevedra, no interior da Coruña, no centro de Lugo, no sur de Ourense, en Valdeorras, no sur de Lugo e no noroeste de Ourense. No que respecta ao mércores non se producirán grandes cambios e o escenario será moi similar ao día anterior.
O anticiclón comezará a debilitarse a partir do xoves debido ao aire frío nas capas medias e altas da atmosfera, que contribuirá a crear un escenario de inestabilidade. Malia que continuará a calor en Galicia, con máximas de ata 30 graos ata o domingo, producirase un notable alivio térmico en relación ás xornadas anteriores. O gran cambio será o aumento da probabilidade de tormentas, que persistirá ata a vindeira semana. O certo é que as temperaturas que se acadarán nesta segunda quincena de xuño son máis habituais de xullo e agosto. En definitiva, un verán anticipado.
