Un terremoto de magnitude 2,7 rexistrouse na mañá deste sábado con epicentro no concello de Mondariz. A terra tremeu ás 11.39 horas, segundo informou o Instituto Xeográfico Nacional, e o hipocentro estivo situado a 23 quilómetros de profundidade.
Este novo sismo chega nunha semana na que se teñen rexistrado sete movementos sísmicos en Galicia, que comezaron o día 20 en Cualedro (con magnitude 2,4), o 21 no océano Atlántico fronte á costa galega (2,7), o 22 en Taboada (1,5), o 22 de novo no Atlántico (3,3), o 23 en Vilaboa (1,7), o 24 en A Gudiña (2,) e finalmente o de Mondariz deste sábado (2,7).
A baixa magnitude do sismo de Mondariz fai difícil que sexa percibido pola maioría da poboación, pero si existen casos puntuais de cidadáns que sentisen o movemento. Se sentiu este movemento sísmico, pode colaborar co Instituto Xeográfico Nacional enchendo este cuestionario on line.
No caso do terremoto de Taboada, rexistrado o pasado martes 22 de xaneiro, todo indica que a súa razón pode atoparse no veciño encoro de Belesar, onde os movementos das augas provocan pequenos sismos na zona, como teñen comprobado os científicos en diversos estudos. Aquí podes ler máis sobre este fenómeno:
