Esta vez foi na praia da Canteira, na Illa de Arousa. Foron os vixiantes da Confraría os primeiros en toparse cun manto de cadáveres na beira do mar: navallas, ameixas e longueiróns cubrían a area. Inmediatamente chamaron á Organización de Produtores de Marisco e Cultivos Mariños da Provincia de Pontevedra (OPP20) e co Instituto Tecnolóxico para o Control do Medio Mariño de Galicia (Intecmar), para que os biólogos recollesen mostras.
A presidenta da OPP20, Inma Rodríguez, explica que leva mariscando toda a vida e que nunca vira tal cantidade de marisco morto na praia. Non quere aventurarse en asegurar a cantidade de moluscos que perderon, pero asegura que “moitos quilogramos de marisco”. De feito, as mariscadoras tiñan sementada toda esta zona para a campaña de Nadal. Na súa opinión, esta catástrofe pode estar relacionada con algún vertido ao mar ou tamén coa variación da temperatura da auga. Aínda que estes días o termómetro marca valores estables.
Dende a Confraría da Illa da Arousa agardan con preocupación os resultados do Intecmar. Temen que o resto do marisco sementado teña algún tipo de afección e non se poida recoller. A Ría de Arousa atópase nas súas horas máis baixas. Os eventos extremos derivados do cambio climático non deixan de traer desgustos aos traballadores do mar. As organizacións de produtores alertan da falta de ameixa e berberecho pola subida da temperatura da auga. Ocorre o mesmo coa mexilla, a cría do mexillón, pola falta de calcio do mar derivado da extracción masiva ao longo de décadas, sen repoñer nas augas o carbonato cálcico necesario para que estas criaturas medren.
Hai cuestión de semanas ocorreu algo similar na Lanzada, cando, coincidindo cunha aguda subida da temperatura do mar, apareceu a praia repleta de exemplares mortos de navalla. A Consellería do Mar está sendo a encargada de estudar o sucedido, mais apunta que os termómetros marcaban uns 20 graos aqueles días e puido ser a causa da morte. De momento, informa que os resultados tardarán en coñecerse.
