Únete á nosa canle de Whatsapp
Centenares de exemplares mortos de navalla atopáronse onte na praia da Lanzada, nos municipios do Grove e Sanxenxo. O Instituto Tecnolóxico para o Control do Medio Mariño en Galicia (INTECMAR) e a Consellería do Mar son as institucións encargadas de investigar a causa da morte deste molusco. Os biólogos están realizando os traballos pertinentes e prefiren non adiantar as causas de morte, mais non descartan que sexan as altas temperaturas que está sufrindo o Atlántico Norte as que puidesen propiciar esta catástrofe.
É unha mortandade masiva de navallas, coquina e longueirón. Dende a Confraría de Pescadores do Grove non se atreven a adiantar acontecementos, e mantéñense á espera de que a Xunta confirme os resultados dos estudos, non sen preocupación polas consecuencias que isto poida ocasionar nas súas actividades extractivas de marisco. Nos últimos días as augas rozaron os 20º, unha temperatura moi elevada e á que estas criaturas mariñas non están acostumadas.
Varios mergulladores tomaron mostras ao longo do martes, explican dende a Confraría, e buscaron outros moluscos no mar que aínda tivesen carne para poder estudalos, xa que a praia principalmente se encheu de conchas. A bióloga da Confraría de Noia, Liliana Solís, considera que o máis probable é que quedasen sen osíxeno, máis estráñalle que a morte se deba exclusivamente á temperatura do mar. Recoñece sen dúbida que a variación da temperatura é unha posibilidade, pero de momento “todo son hipóteses”.
O quecemento dos océanos de todo o planeta é unha gran preocupación por parte da comunidade científica. A anomalía nas temperaturas deixou esta fin de semana miles de peixes mortos na costa de Texas, en Estados Unidos (EE.UU.), cubrindo a praia con exemplares xa en estado de descomposición.
