Galicia vive un xullo especialmente fresco no ano en que a Terra acada o récord de calor

A temperatura media en Vigo é de 19,8 graos e de 20 en Santiago

Xullo é o mes máis caloroso a nivel global dende que existen rexistros segundo datos da Organización Meteorolóxica Mundial (OMM), cunha temperatura media de 16,95 graos celsius. O 6 de xullo foi ademais o día máis quente nunca antes rexistrado. Mentres que as temperaturas na península tamén acadan valores insólitos durante este verán, Vigo anota o segundo xullo máis fresco en 11 anos. A temperatura media, segundo datos de MeteoGalicia, foi de 19,8 graos, só superada en 2021 e 2012, que caeu ata os 19,2. Santiago tamén logra unha temperatura media de 20 graos. Unhas diferencias moi pronunciadas e que evidencian a influencia atlántica.

Cal é o motivo destas temperaturas? O anticilón das Azores está situado máis ao oeste que o normal. A isto, súmaselle a presenza de vaguadas no Atlántico norte que alimentan as borrascas, impedindo que o anticiclón se mova. Na actualidade, unha fronte fría mantén Galicia cos ceos cubertos e algunhas precipitacións polo menos ata o domingo. “O clima extremo que afecta a millóns de persoas en xullo amosa a dura realidade do cambio climático e anticipa o futuro”, advertiu nun comunicado o secretario xeral da OMM, Petteri Taalas, que apuntou que “a necesidade de reducir os gases de efecto invernadoiro é maior que nunca”.

Publicidade

Os datos do Servizo de Cambio Climático Copernicus (C3S) da Unión Europea establecen que a media mensual de 16,95 graos, elaborada con datos dos 23 primeiros días de xullo, supera o anterior récord para un mes, que estaba situado en 16,63 graos en xullo de 2019. De feito, o mes pasado, xuño, foi o máis cálido dende que existen rexistros, 0,5 graos por enriba da media entre 1991 e 2020 e máis que no récord previo, xuño de 2019.

Temperatura global nos primeiros 23 días de xullo. Foto: Copernicus

Récord de temperaturas para o Atlántico Norte

O sistema europeo afirmou que as temperaturas de xuño alcanzaron niveis máximos no noroeste de Europa, parte de Canadá, Estados Unidos (EE.UU.), México, Asia e o oriente de Australia. Tamén Copernicus identificou que as temperaturas da superficie dos océanos acadaron récord en xuño con “temperaturas anómalas” no Atlántico Norte. En definitiva, mentres que o resto do mundo está a sufrir días abrasadores, Galicia resiste ás ondas de calor.

Publicidade

Os récords de xullo prodúcense nun momento no que o clima global está influenciado polo fenómeno de El Niño, que provoca un aumento de temperaturas en moitas rexións do planeta. O secretario xeral da ONU, António Guterres, alegou que “a era do quecemento global rematou e entramos na da ebulición global. O cambio climático está aquí, é terrorífico e isto é só o comezo”. Asegurou ademais, que, “a menos que haxa unha pequena idade de xeo nos próximos días, xulio deixará numerosos récords que se sairán das gráficas”.

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

Dentro do ‘Odón de Buen’, o buque ‘vigués’ que navega cara á nova campaña científica na Antártida

O oceanográfico construído en Galicia participará por primeira vez nas operacións de apertura das bases españolas do polo sur

Do 100% ao 36% nun trienio: a “preocupante” evolución da seca nos encoros galegos

A serie histórica de Eiras vai en liña coa situación de Cecebre, que marca o seu mínimo dos últimos 15 anos tras reducir case á metade as súas reservas

Galicia está entre as zonas cun maior declive de polinizadores de Europa

Entre os anos 1921 e 2020, na rexión atlántica diminuíu un 42% a ocupación das especies de abellas e nun 32% a dos sírfidos

Cidades nas que vivir

Un estudo analiza os patróns de xentrificación en Vigo, Santiago e A Coruña