A última semana de xullo está sendo estable en Galicia. O mércores algúns puntos do país superarán os 30 graos e será o día da semana máis caloroso. Unha DANA situada ao norte de Madeira ascenderá ata Galicia e chegará en forma de vaguada durante a mañá do xoves. Isto suporá ceos nubosos no país e algún chuvasco ou tormenta illada. A isto súmaselle a chegada dunha fronte fría en superficie o venres e o sábado que baixará as temperaturas ata seis graos. Agárdase que o domingo se empece a recuperar a influencia anticiclónica con temperaturas arredor dos 28 graos de cara a próxima semana.
“A vaguada non afectará demasiado, chegará pola mañá do xoves, se chegase pola tarde, cando máis enerxía hai na atmosfera, podería dar lugar a fenómenos tormentosos importantes”, explican dende MeteoGalicia. Xa no mediodía do xoves agárdanse nubes de evolución diúrna no este e sureste de Ourense, mais non será un episodio de inestabilidade significativo. As temperaturas descenderán sobre todo na metade sur da provincia da Coruña e Pontevedra.
O xoves, os ventos non soprarán de compoñente norte, senón do oeste, e os termómetros caerán de maneira importante especialmente no litoral das Rías Baixas. “Se hoxe falamos de máximas de 30 graos en Pontevedra ou Vigo, mañá quedarán por debaixo dos 25”, apuntan dende MeteoGalicia. A baixada térmica en Santiago poderá ser de dous ou tres graos, e no resto de Galicia non se notará o descenso pronunciado ata o venres, coa chegada da fronte fría.
Xa a partir do domingo, as temperaturas subirán anticipando unha semana maioritariamente de ceos despexados e clima propio de verán, puidendo recuperar os 30 graos de maneira progresiva. Esta previsión volve contrastar coa tónica da climatoloxía do resto da península. A fin de semana agárdanse temperaturas que alcanzan os 40 graos nalgunhas zonas do Guadalquivir, subindo aínda máis de cara o luns 31. Mentres tanto, Galicia mantén unhas temperaturas estables e agradables logrando esquivar as ondas de calor.