Chegamos ao tramo máis alto. A montaña rusa térmica na que está Galicia nestes momentos acadou o seu punto álxido entre as 19:00 e as 20:00 horas do luns, cunha tarde de moito calor polo sol e a chegada de aire quente, segundo Meteogalicia. Así, varios puntos da comunidade acadaron valores elevados, con 38,2 graos en Leiro, 37,5 en Ourense, e por riba dos 36 no Porriño e en Salceda de Caselas.
En puntos do litoral sur, como en Pontevedra, os termómetros marcaron os 34 graos. Tamén cifras próximas en Marín, Sanxenxo, Vigo e A Lanzada con valores entre os 32 e os 34. No norte, as temperaturas foron máis moderadas, Ferrol mantívose con 25,4 graos, A Coruña con 23,4 e Foz con 18,3. Iso si, sol sen choivas na meirande parte da comunidade, segundo a institución meteorolóxica.
As tardes de calor precederon as noites de bochorno. En Vigo o termómetro chegou os 27 graos ás 2:10 horas da madrugada. Noutros puntos, como en Carnota ou en Oita, tamén se superaron os 25 graos. En xeral, unha noite tropical cun calor que aínda se mantén este martes, onde os valores matinais estiveron por riba dos 25 graos en Fornelos de Montes e nas Neves desde as 9:20 horas. Xa cara ao mediodía, os termómetros superaban os 30 graos en Ribas de Sil, en Rubiá e en Ourense.
Inestabilidade e treboadas
O tempo cambiará durante este martes, sendo pouco a pouco máis inestable, segundo os modelos. As nubes de evolución darán paso ás treboadas, con choivas localmente fortes, durante a tarde. Pola noite aínda serán máis activas en gran parte da comunidade. Especialmente no Miño e no litoral de Pontevedra, no oeste e no suroeste da Coruña. Nestes puntos, Meteogalicia activou unha alerta que estará activa entre as 21:00 horas e as 6:00 horas. Tamén haberá refachos fortes na zona do sur-suroeste e tamén soprará o vento con forza na metade norte da comunidade.
Iso si, as máximas descenderán no sur, especialmente nas áreas do Miño en Pontevedra, no sur de Ourense e en gran parte das Rías Baixas. Por outra banda, ascenderán moderadamente no norte, e con especial intensidade no nordeste de Lugo, segundo os modelos meteorolóxicos. Ademais, mantéñense as alertas por calor na zona do Miño de Ourense, con máximas que poden chegar aos 36 graos na capital de provincia e superar os 30 en Lugo, Pontevedra e Santiago. As mínimas serán algo máis moderadas, baixando dos 20 graos.
