MeteoGalicia advirte da entrada de po en suspensión en toda Galicia. Tras os días de calor intenso e coa chegada das treboadas, a comunidade tamén terá unha peor calidade do aire. Unha masa de aire africano traerá partículas PM10 e PM2.5, que poden provocar problemas para a saúde. Por iso, desde a institución piden precaución durante os seguintes días. Segundo o modelo SKIRON tamén se podería producir un depósito seco de po sobre a superficie da península durante este martes. Esta situación afectará primeiro ao leste de Galicia, aínda que acabará afectando a todo o territorio.
A orixe destas partículas está nos solos areosos do Sáhara. Certos fenómenos meteorolóxicos, como anticiclóns e borrascas, favorecen que grandes cantidades de po percorran longas distancias pola atmosfera ata chegar a Galicia. Esa é a previsión actual e tamén foi o caso do episodio de calixe que se viviu no 2022 e que deixou numerosas incidencias. Este tipo de partículas poden provocar complicacións na saúde, especialmente para aquelas persoas con problemas respiratorios como asma. Estas deben evitar estar en espazos exteriores, aínda que en caso de ter que facelo, pode axudar o uso de máscaras.
