Galicia rexistrou en 2025 o cuarto ano máis cálido das últimas seis décadas, segundo datos do informe climatolóxico anual elaborado por MeteoGalicia, presentado hoxe pola conselleira de Medio Ambiente e Cambio Climático, Ángeles Vázquez. A medicións recollida nas estacións de temperatura e precipitacións distribuídas por toda a comunidade sitúan ao ano pasado como “extremadamente cálido e moi húmido”, tal e como subliñou a conselleira.
A temperatura media anual alcanzou os 14,7 graos, un valor considerado extremadamente cálido que converte a 2025 como o cuarto ano máis cálido desde 1961. De feito, os últimos catro anos rexistraron valores semellantes, consolidándose como os máis calorosos da serie histórica. En particular, o mes de xuño foi o máis cálido desde que se teñen datos.
Máis polo miúdo, as temperaturas mínimas e máximas superaron en media en 1,1 graos os valores habituais. Dos doce meses do ano, dous foron extremadamente cálidos, concretamente xaneiro e xuño, mentres que houbo sete moi cálidos ou lixeiramente cálidos. Pola contra, marzo foi lixeiramente frío, setembro frío e decembro cunha temperatura normal.
En canto ás precipitacións, Ángeles Vázquez explicou que a media anual en Galicia foi de 1.524 litros por metro cadrado, un 18% superior ao habitual, polo que 2025 se considera un ano moi húmido. Xaneiro destacou como extremadamente húmido; abril e novembro, moi húmidos; e decembro, húmido. En contraste, xuño foi moi seco, e xullo, agosto e outubro, secos. Os meses restantes presentaron precipitacións normais.
Coñecemento científico
A conselleira, que estivo acompañada da directora xeral de Enerxías Renovables e Cambio Climático, Paula Uría, destacou o papel de MeteoGalicia ao poñer o mellor coñecemento científico ao servizo da protección do litoral, da seguridade do mar e do futuro dos sectores que viven del.
Neste sentido, indicou que Galicia conta xa cunha nova ferramenta para entender mellor o comportamento do mar, e especialmente das rías. Trátase dun modelo bioxeoquímico, desenvolvido en colaboración con Intecmar e Cetmar, que analiza de forma conxunta todas as Rías Baixas e permite comprender como se relacionan entre si e como circula a auga dunha a outra. Ademais, este avance proporciona información sobre aspectos fundamentais para o bo estado das rías e a súa produtividade, como os niveis de osíxeno e a dispoñibilidade de nutrientes.
Estes datos tradúcense nunha base máis sólida para a toma de decisións relacionadas co litoral e o mar, xa que permiten anticipar riscos ambientais, coidar os ecosistemas mariños e apoiar de forma máis eficaz os sectores vinculados ao mar.
Ángeles Vázquez concluíu con que este modelo “supón unha ferramenta clave para avanzar cara a esa Galicia Calidade a través dunha xestión máis sostible do litoral, a protección dos ecosistemas mariños e un futuro máis resiliente nun contexto de cambio climático”.
