Benvidos a unha semana pasada por auga. Un carrusel de borrascas entrará por Galicia, deixando días de precipitacións constantes na comunidade. Aínda que se alternarán con claros, segundo o modelo europeo que anuncia o medio Meteored poderían caer máis de 150 ou 200 l/m2. A auga estará presente nas catro provincias, e os termómetros acadarán valores fríos, con máximas arredor dos 10ºC, segundo anuncia MeteoGalicia a través da súa canle de X.
Como informa Samuel Biener dende Meteored, mañá aparecerá unha primeira fronte na península que repartirá chuvias localmente intensas no norte e oeste da comunidade, para despois estenderse polas provincias veciñas do noroeste. O descenso en latitude do chorro polar terá como consecuencia que as borrascas teñan porta aberta dende Grenlandia ata España, polo que as precipitacións serán xeneralizaras e en forma de neve nos principais sistemas montañosos.
A predición do servizo meteorolóxico galego para os próximos catro días sinala probabilidades de ocorrencia de chuvia que rondan o 80 e 95%, sobre todo cara a mediados de semana. Así mesmo, as temperaturas ascenderán progresivamente ata que a partir do xoves volva a entrar aire frío.
40 l/m2 e alerta amarela
MeteoGalicia informa de alertas amarelas en terra por chuvias nas xornadas do martes e mércores. Na provincia de Pontevedra caerán máis de 40 l/m2 en 12 horas, igual que no interior e o oeste da Coruña, na Costa da Morte. Outra das advertencias é o vento, que poderá superar os 80 quilómetros por hora en toda a costa, xunto coas zonas montañosas de Lugo e Ourense.
