O litoral galego será, nos próximos meses, un punto de tránsito para a subpoboación ibérica de candorcas (Orcinus orca) que se desprazan na súa ruta migratoria. Nos últimos anos, algúns destes movementos derivaron en interaccións entre os cetáceos e distintos tipos de embarcacións, o que propiciou a elaboración por parte do Goberno dun mapa que detalla a probabilidade de que se produzan estes encontros. A ferramenta deseñouse segundo a cantidade de interaccións recollidas pola Sociedade de Salvamento e Seguridade Marítima (SASEMAR) entre 2022 e 2025.
O seguimento dos Centros de Coordinación de Salvamento Marítimo denota que o número de encontros diminuíu no sur de España. En contraste, rexistrouse un aumento nos casos producidos en Galicia. Fisterra, Arousa e a Costa da Morte son os puntos nos que se agarda unha maior probabilidade de interaccións.
En caso de avistamento
As candorcas desprázanse seguindo os movementos do seu alimento: o atún. Coa chegada do verán, continuarán a ruta cara ao norte da costa atlántica dende o Golfo de Cádiz. O Ministerio de Transición Ecolóxica e Reto Demográfico (MITECO) pide evitar a navegación polas zonas de maior densidade entre xullo —mes no que se produciu o primeiro encontro de 2025 na comunidade— e outubro; esta recomendación atópanse xa vixente no Golfo de Cádiz e no Estreito de Xibraltar.
En caso de producirse unha interacción, recoméndase que a embarcación, sexa a motor ou a vela, continúe a súa navegación cara á costa, a augas menos profundas. As persoas a bordo deberán evitar as bandas e situarse en zonas que ofrezan a maior protección contra movementos bruscos súbitos.
Así mesmo, Transición Ecolóxica fai fincapé en que non deben realizarse condutas que poidan causar “morte, dano, molestia ou inquietude aos cetáceos”. Despois dun avistamento, será necesario notificalo ao Centro de Coordinación de Salvamento (CSS) máis próximo.
