O luns inicia cunha xornada de calor que se verá truncada por unha borrasca fría que se situará no suroeste da península ibérica e fará caer os termómetros ata 10°C. Os modelos anticipan nubosidade e precipitación para martes e mércores, con algunhas que poderían ter carácter tormentoso en Galicia, como anuncia ElTiempo.es. Esta zona de baixas presións que pasará pola comunidade traerá humidade, aire frío e mesmo po en suspensión durante os primeiros días da semana.
Segundo David Domínguez, detrás do perfil de X @RedmeteoP, este luns será o día máis cálido de 2026, con máximas superiores aos 25°C en boa parte de Galicia. En Santiago de Compostela notifícanse ata os 27°C, aínda que descenderán ata 16°C o martes. O mesmo ocorrerá en Vigo e Pontevedra, que pasará de 27°C a 17 para volver o xoves aos 24°C. Na Coruña haberá unha menor diferencia, de 26°C a 19°C, tal e como indican os modelos preditivos de MeteoGalicia. Ourense, mentres, pasará de 27°C a 20°C.
Neste punto, o martes chegará tamén un temporal marítimo en forma de alerta: na Costa da Morte haberá ondas de 5 a 6 metros de altura, declarando o aviso laranxa dende a axencia galega, e avisos amarelos no noroeste da Coruña e Rías Baixas.
A chegada de po sahariano
Dende o luns, o po en suspensión procedente do norte de África entrará en Galicia, polo que a calidade do aire será baixa e a visibilidade, tamén. Con todo, haberá concentracións máis baixas que no sur e centro peninsular. O portal meteorolóxico Meteored anuncia que a chegada da fronte atlántica poderá deixar chuvias de barro o martes, cunha maior probabilidade ao coincidir o pico de calima coas precipitacións máis activas.
