A atención está posta no prognóstico de cara aos vindeiros días: choverá durante a Semana Santa? A previsión para Galicia é máis favorable do habitual e todos os servizos meteorolóxicos apuntan tempo solleiro, estabilidade atmosférica e temperaturas agradables. Non obstante, o territorio estará dividido en dous. Mentres o sur vai acadar valores superiores aos 20 graos, o norte non chegará a eles e, incluso, a cidade da Coruña non superará os 15 graos de máxima. O prognóstico a medio prazo apunta a un cambio de patrón, coa chegada dunha fronte a comezos da vindeira semana.
O martes e o mércores son a antesala dos festivos e a previsión de Meteogalicia é de ceos despexados en practicamente todo o territorio galego debido á influencia do anticiclón dos Azores. As temperaturas chegarán aos 24 graos de máxima en Vigo, mais non superarán os 16 na Coruña; unha tendencia semellante á do resto de cidades galegas en función de se están no terzo norte ou no terzo sur da comunidade. O mércores agárdanse chuvias febles na Mariña lucense. En xeral, as temperaturas sufrirán un lixeiro descenso debido ao vento do nordés.
Predición para os festivos
O Xoves Santo será o primeiro festivo, con previsión de chuvias no extremo norte de Galicia polo paso dunha fronte pouco activa. Con todo, iranse abrindo claros conforme avance o día. As temperaturas non experimentarán cambios significativos e manteranse nos 20 graos de máxima nas cidades da metade sur e nos 15 graos nas do norte. O escenario cambia de cara ao venres, cunha notable repunta térmica pola chegada dunha nova dorsal subtropical. Así, Ourense chegará aos 24 graos e Santiago aos 23, mentres que Lugo, Vigo e Pontevedra oscilarán arredor dos 22. Ferrol quedará nos 18 graos e A Coruña, de novo, nos 15.
En canto á fin de semana, non se prevén grandes cambios. Espérase que continúe sobre Galicia a influencia anticiclónica, aínda que cada vez máis debilitada. De feito, para o sábado e o domingo agárdanse altas probabilidades de ceos nubrados. En canto ás temperaturas, manteranse como en días anteriores, e serán especialmente baixas para a época do ano na metade norte de Galicia. Prevese un cambio radical de tempo de cara a comezos do vindeira semana, cando volverían entrar as borrascas polo Atlántico.
