O Ministerio de Agricultura, Gandaría e Pesca prohibe a cría de aves de corral ao aire libre a partir do próximo 10 de novembro en 40 concellos galegos. Once xa tiñan esa prohibición desde xaneiro, aos que se suman outros 29 máis. Ademais, tamén queda prohibida a cría de patos e gansos con outras especies de aves de corral. É a consecuencia do aumento do risco e do número de casos rexistrados a gripe aviaria en España e en Europa, xunto coa previsión de descenso das temperaturas, que beneficia ao virus. Galicia conta, ademais, con cinco comarcas en alerta máxima.
Non é a única prohibición: nestes concellos tamén se prohibe dar auga procedente de depósitos que sexan accesibles para as aves silvestres. A intención é evitar que esas especies, que teñen máis capacidade de propagar o virus a distintas áreas, queden afectadas. Tamén estará prohibida a presenza de aves de corral en certames gandeiros, premios, exhibicións, mostras e celebracións culturais salvo que se realice unha avaliación do risco e resulte favorable.
Por outra banda, nos casos nos que non sexa posible prohibir a cría ao aire libre, a autoridade competente poderá autorizar o mantemento das aves mediante a colocación de dispositivos que poidan impedir a entrada de aves silvestres. Os alimentos e a auga que precisen estas aves deben de estar tamén protexidas para evitar que poidan entrar en contacto con aves silvestres. Tamén queda prohibida a utilización de paxaros Anseriformes e Charadriiformes como reclamos.
Que concellos vense afectados
Segundo a lexislación, os novos 29 concellos afectados serán aqueles nas Zonas de Especial Vixilancia establecidos pola Orden APA/2442/2006. É dicir: Cariño, Dumbría, Mazaricos, Ortigueira, Porto do Son, Rianxo, Ribeira, Vimianzo, Zas, Ribadeo, Trabada, Porqueira, Rairiz de Veiga, Sandiás, Vilar de Santos, Xinzo de Limia, A Guarda, Marín, Meis, Moaña, Poio, Pontevedra, Redondela, O Rosal, Soutomaior, Tomiño, Tui, Vilaboa e Vilagarcía de Arousa.
Súmanse así aos concellos incluídos nas Zonas de Especial Risco. Estos son: Cambados, O Grove, A Illa de Arousa, Meaño, Ribadumia, Sanxenxo, Vilanova de Arousa, Xove, Ordes, Cerceda e Tordoia. En Galicia, xa se detectaron casos de gripe aviar, pero só nalgunhas aves silvestres, como o caso de Moaña o pasado 17 de outubro.
Ata 139 gromos na Unión Europea
Por outro lado, hai zonas que se consideran de maior risco na avaliación comarcal que publican as autoridades cada semana. En Galicia son A Barbanza, O Sar, Noia e Ferrol, que se atopan en risco “moi alto”. En total, hai ata 16 comarcas clasificadas desta forma. Entre elas, Ferrol, Coruña, Pontevedra e Vigo.
De momento, o país rexistrou 14 focos en aves de corral, pero a preocupación é a nivel europeo pola aparición de moitos outros gromos noutros países da Unión Europea. O máis afectado é Alemaña, con 59 casos rexistrados, seguido de Polonia con 17, e Italia con 16. España atópase cuarta na lista. En total, xa se rexistrou un total de 139 gromos en toda a Unión Europea.
A Xunta tamén insiste na necesidade de reforzar as medidas de seguridade nas granxas. Ademais, malia que o serotipo vírico detectado (H5N1) mostrou unha escasa capacidade de zoonose, as autoridades autonómicas recomendan non manipular aves atopadas enfermas ou mortas e comunicar o feito aos servizos veterinarios oficiais da Consellería do Medio Rural ou da Consellería de Medio Ambiente e Cambio Climático.
