Luns, 18:10 horas. Os termómetros do concello ourensán de Leiro marcan 31,6 graos. É a máxima temperatura rexistrada en Galicia no último día de marzo, seguida da capital de provincia, con 30,7 graos, e de Arnoia, con 30,1. Valores máis propios do verán que dunha primavera incipiente que animaron os galegos a sacar sandalias e mangas curtas. Non obstante, unha borrasca atlántica situarase nas vindeiras horas no oeste da península e lanzará unha sucesión de frontes ata o venres que provocará, de novo, inestabilidade, chuvia e, incluso, tormentas en Galicia. O prognóstico aínda é moi incerto de cara á fin de semana.
As temperaturas continuarán con valores propios da época máis calorosa do ano durante o martes, con temperaturas que superarán os 27 graos en Ourense e estarán por enriba dos 20 no resto de cidades galegas. Con todo, Galicia xa estará nunha situación intermedia entre as altas e as baixas presións. É probable que nas comarcas de interior se produzan chuvascos illados de cara á noite. Unha situación de inestabilidade que se recruará o mércores, coa borrasca situada xa no oeste da península. De feito, Meteogalicia agarda que se produzan chuvascos localmente tormentosos, máis probables durante a tarde.
Descenso das temperaturas
A entrada da inestabilidade tamén causará un descenso das temperaturas máximas, que quedarán arredor dos 20 graos. Non obstante, do mércores ao venres o escenario máis probable en Galicia son as chuvias. Dende eltiempo.es prognostican que será onde máis precipitacións se rexistren de toda España, xunto ao Sistema Central e Andalucía. Esta situación, segundo aparece recollido nunha peza do portal Meteored, vén propiciada por un bloqueo anticiclónico entre o Mar do Norte e Islandia. Isto provocará que as borrascas circulen en latitudes máis baixas e deixen inestabilidade no sur de Europa.
No que respecta á fin de semana, aínda hai moita incerteza na predición. Dende Meteogalicia cren que Galicia continuará nunha situación intermedia entre o anticiclón, situado ao norte de Escocia, e unha borrasca entre os Azores e Portugal. “Teremos un prognóstico cambiante. Haberá días de alternancia de nubes e claros con probabilidade de chuvascos de tipo treboento”, indican na súa páxina web. Dende outros servizos, como eltiempo.es e Meteored insisten na dificultade de prognosticar a tantos días vista. O primeiro deles aposta pola estabilidade, mais non descarta a entrada dunha nova borrasca atlántica nos últimos días da semana.
