Os ceos locen descubertos na meirande parte de Galicia durante estes primeiros compases da primavera que se estreou hai unha semana. E así continuarán polo momento, aínda que un cambio na forma de circulación do aire en toda Europa introduce incógnitas a partir do luns.
Na fin de semana na que os vigueses celebran a súa Reconquista e se poderá desfrutar dunha eclipse, o anticiclón seguirá aloxado en Galicia deixando sol e temperaturas que poderían chegar ata os 25 grados na provincia de Pontevedra e no interior ourensán, como apuntan as predicións de Meteogalicia.
Pero a situación tórnase unha incógnita a partir de entón. Por que? Porque a partir do sábado instalarase sobre Europa unha configuración en omega que podería mesmo deixar unha dina na costa galega a partir de mediados de semana.
O chorro polar formará meandros
Unha configuración en omega debe o seu nome á forma que debuxan as correntes do aire imitando a derradeira letra do alfabeto grego. Fórmase cando o chorro polar vese obrigado a bordear unha gran dorsal para, despois, descender de novo de latitude, segundo explica o meteorólogo Samuel Bienner en Meteored.
Esta situación, típica da primavera, forma importantes meandros que acentúan a variabilidade no tempo. E a península queda nos máximos de presión desta configuración, o que abre a porta a un escenario de grande incerteza sobre que tempo imos atopar ao longo da semana.
De feito, os modelos meteorolóxicos apuntan á posibilidade de que entre o xoves e o venres da primeira semana de abril chegue unha borrasca fría ou dina ás costas do oeste da península ibérica. Galicia sería a porta de entrada destas precipitacións, que se moverían máis tarde a zonas do sur e da vertente mediterránea.
Con todo, aínda é cedo para predicir con exactitude como nos afectará a configuración en omega. Polo que esta fin de semana toca desfrutar dunha fin de semana de sol en case toda a xeografía galega.
