As previsións meteorolóxicas confirman que as elevadas temperaturas que abafan Galicia se manterán durante os próximos días, con valores xeneralizados por enriba dos 30 graos e mesmo máximas de 40 previstas nalgunhas áreas. Dende MeteoGalicia sinalan que non falan dunha vaga de calor, senón dun episodio: “Unha onda de calor ten unha duración determinada, de polo menos tres días, e afecta unha área xeograficamente ampla. Polo momento, referímonos a un episodio de calor, en tanto que as temperaturas máximas e mínimas superan limiares seguros”. Atribúen esta situación á presenza dun domo de calor complementado coa persistencia dun anticiclón e a chegada de masas de aire quente do sur.
A axencia meteorolóxica explica que aínda non se pode determinar a duración deste evento. Así e todo, apunta que se manterá, ‘con total seguridade’, no sur durante a tarde de hoxe. “Ademais, o sábado e o domingo aínda agardamos unha calor xeneralizada. O luns e o martes podería permanecer no interior, pero as brisas atlánticas e as brumas irían suavizando as temperaturas polo litoral”, explican.
Un domo de calor, o responsable dos valores térmicos
MeteoGalicia sinala un domo de calor como o principal causante de que os termómetros superen os 30 graos en boa parte de Galicia. “Temos un anticiclón sobre nós e veñen masas de aire moi cálidas dende o sur da península e África“, aclaran. Dende a axencia explican que as altas presións inhiben os movementos verticais e comprime a atmosfera nos niveis máis baixos, o que contribúe ao aumento térmico.
Así, agárdase que o que resta de xornada sexa seca e solleira, con máximas altas en todo o territorio. Prevese que Vigo e Ourense cheguen aos 38 graos, Pontevedra quede en 37, Santiago de Compostela en 31, e Lugo, Ferrol e A Coruña permanezan por debaixo dos 30 graos, coas dúas primeiras en 28 e a terceira en 27. Estas temperaturas fan que boa parte de Galicia se atope baixo alerta vermella polo risco que supoñen os elevados valores.
A fin de semana, máis calor
O sábado aumentan as temperaturas: Meteogalicia sinala que todo o territorio galego superará os 30 graos. En Ourense, de feito, agárdase chegar aos 40. Esta calor diurna virá acompañada, en Vigo, dunha noite tropical na que a mínima prevista será de 21 graos. A situación non mellorará o domingo: o norte terá valores superiores aos 30 graos e a meirande parte do sur de Galicia estará por enriba dos 35, de novo prevendo o maior golpe en Ourense, onde se esperan 40 graos de máxima por segundo día consecutivo. As provincias de Pontevedra e A Coruña terán mínimas que rondarán o limiar dos 20 graos, que, de novo, se superarán en Vigo, polo que se confirmaría unha segunda noite tropical na área.
O luns haberá un lixeiro respiro que, non obstante, aínda contará con valores máximos que se manterán por riba dos 30. A noite será un pouco máis fresca en toda a comunidade, agás en Ourense, onde a temperatura mínima será de 19 graos.
Se leva por diante moitos terraplanistas, aínda terá unha de boa.