Pontevedra amence o luns 29 de xuño con temperaturas superiores aos 20 graos. A estación de Tremoedo, en Vilanova de Arousa, rexistrou 21,5ºC ás 9:50 horas. Así, Galicia dá a benvida a unha semana que, segundo o European Centre for Medium-Range Weather Forecasts (Ecmwf), rexistrará unha anomalía de temperaturas de ata 6 graos, concentrada sobre todo na metade sur da comunidade. A causa dos altos valores será un novo domo de calor que podería disparar as temperaturas a partir do domingo 5 de xullo, un fenómeno no que o aire cálido queda atrapado baixo unha grande área de altas presións, comprimíndose e quentándose, tal e como explican dende o portal meteorolóxico Meteored. Podería vir acompañado, ademais, dunha pequena dina ao oeste peninsular, o que reforzaría a calidez no ambiente.
MeteoGalicia informa a través do seu perfil de X de que o anticiclón e o nordés serán as claves de que a calor asente no territorio. Ademais, estas condicións activarán o afloramento en augas costeiras, polo que a temperatura do mar será máis fresca. Mentres, na Mariña lucense predominarán as nubes baixas. A Axencia Estatal de Meteoroloxía (Aemet) resume como será a situación en Galicia durante a próxima semana: “Máis cálida do normal, especialmente na metade sur; Máis seca do normal agás na Mariña, onde será normal”.
Así, no comezo de xullo, as temperaturas tenderán á alza. O día 2 iniciará a calor intensa: Ourense, Vigo e Pontevedra superarán os 30 graos. A cidade olívica chegará aos 34ºC segundo a previsión da axencia galega, o mesmo valor que se acadará en Ourense a pesar da influencia termorreguladora do mar. Pola súa banda, Santiago de Compostela chegará aos 28ºC. Con todo, farase evidente a diferenza térmica entre norte e sur: A Coruña e Ferrol rexistrarán 25ºC e Lugo, 24ºC.
