O concello de Ribeira rexistrou máis de 60 dos 689 varamentos que se deron en Galicia durante 2024. Así o reflicten oficialmente os técnicos da Coordinadora para o Estudo dos Mamíferos Mariños (CEMMA) que veñen de publicar o número oficial de animais mariños ―cetáceos, pinnípedos, tartarugas, quenllas e lontras― que chegaron ás costas galegas durante o pasado ano. Como novidade, a organización explica cales foron os lugares que máis varametos documentaron. Encabezado polo concello da Barbanza, os seguintes municipios con máis varamentos foron Muros, O Grove e Sanxenxo, entre outros.
O 70%, no sur de Fisterra
Segundo debulla a Cemma no seu informe, o concello de Ribeira é “o que rexistra máis frecuencia de varamentos con case 60 documentados no 2024”. O 69% dos casos concéntranse na costa ao sur de Fisterra, por iso as seguintes localidades na lista, con máis de 30 exemplares nos seus areais, son Muros, O Grove, Porto do Son e Sanxenxo. Ademais, A Coruña, Bueu, Carnota, Ferrol, Fisterra e Vigo superaron os 20 animais varados. “Os que rexistran maior número atópanse orientados ao mar aberto ou nas bocas das rías”, detallan dende Cemma.
Con respecto ás especies que varan en Galicia, a organización indica que o 2024 documentou un total de 614 cetáceos (89%), 6 pinnípedos (1%), 32 tartarugas (5%), 23 quenllas (3%) e 14 lontas (2%). Alén disto, tamén se documentaron 17 peixes de especies diferentes como atún, peixe espada ou peixe roda. “Estas cifras, que seguen a liña de 2023, supón un incremento espectacular con respecto a calquera ano anterior ao 2022, superando o dobre da media anual situada nos 270 exemplares entre 1990-2022″, explican.
A maioría son golfiños comúns
Así, dos 689 animais varados en Galicia en 2024, 614 exemplares corresponden ao golfiño común (Delphinus delphis). “Tivo un incremento semellante ao ano anterior, pero quintuplicou a media anterior ao 2022”, matizan. Séguelle nesta lista o arroaz (Tursiops truncatus) con 46 rexistros e a tartaruga mariña común (Caretta caretta), con 10 individuos. Neste último caso, os animais chegaron vivos, foron trasladados a rehabilitación e oito deles acabaron sendo liberados.
A maioría dos cetáceos que apareceron varados estaban mortos e “moitos deles en avanzado estado de descomposición, polo que se descoñece a causa da morte”. Malia isto, o 42% dos cetáceos que apareceron en bo estado para ser valorados, máis do 30% presentaban indicios de morte por captura accidental en faenas pesqueiras. Outros exemplares, segundo a Cemma, mostraban síntomas de mortalidade a causa de enfermidades naturais.
