Os modelos europeos advirten da chegada dunha crista subtropical que afectará á península con temperaturas que poderían acadar os 40ºC no territorio a partir do sábado. Durante o inicio deste fenómeno, Galicia será unha das menos afectadas, aínda que con valores elevados. Meteogalicia aínda non permite coñecer a previsión a máis de tres días vista, pero ata o venres Vigo acadará os 26ºC, Santiago de Compostela os 29ºC e Ourense superará a barreira dos 30ºC.
A causante é unha extensa dorsal que está a ascender cara ao interior de Europa e arrastra consigo unha masa de aire moi cálida. O modelo do European Centre for Medium-Range Weather Forescasts (ECMWF) anticipa para a próxima semana unhas anomalías positivas de temperatura de entre 6ºC no litoral galego e 10ºC no interior de Ourense.
A pesar do ascenso térmico, o servizo meteorolóxico galego emite unha alerta amarela por tormentas localmente fortes para o mércores 17 de xuño no centro, sur e montaña de Lugo, ademais do Miño e montañas ourensás, xunto a Valdeorras. O aviso prolongarase ata o xoves nos Ancares e A Fonsagrada. Con todo, os modelos comezan a amosar unha calor intensa e durareira que coincidirá coa festividade do San Xoán, polo que o desfrute das fogueiras será unha actividade practicamente asegurada se se mantén esta tendencia.
