O importante non é como se empeza, senón como se acaba. Un refrán ben acaído para a situación meteorolóxica de Galicia na segunda semana de abril. Unha fronte asociada á borrasca Pierrick, situada nas illas Británicas, será a protagonista do luns, unha xornada fría e con acumulacións de chuvia que poden acadar os 30 l/m2 nalgúns puntos do territorio. Con todo, Galicia experimentará a partir do mércores un radical cambio de tempo. Un cinto de altas presións, denominado “crista subtropical” provocará un acusado ascenso das temperaturas, que poderán acadar os 30 graos a finais de semana nalgúns puntos de Galicia. Agárdase, por tanto, que o ambiente sexa máis propio do verán que da primavera.
Antes do brusco ascenso das temperaturas, o territorio galego despídese das precipitacións da man da borrasca Pierrick, que deixa avisos amarelos na Costa da Morte e no noroeste da Coruña por ondas entre os 4 e os 5 metros entre o luns e o martes. Agárdase que a maior cantidade de chuvia caia durante a xornada de mañá e que se abran grandes claros a partir do mediodía. Con todo, a fronte asociada a Pierrick trae unha masa de aire frío que impedirá que as temperaturas superen os 15 graos en toda Galicia, con mínimas que roldarán os 7 en todas as cidades galegas. Unha temperatura semellante á do martes, cando as chuvias desaparezan para dar paso á influencia das altas presións.
O mércores producirase un brusco cambio de tempo en Galicia pola entrada de aire cálido en superficie, segundo informa Meteogalicia. O portal Meteored atribúe este acusado ascenso das temperaturas a unha “crista subtropical” que elevará os termómetros ata os 30 graos nalgúns puntos de Galicia, deixando tempo seco e ceos practicamente despexados. Malia que as temperaturas máximas estarán por enriba da media para esta época do ano, as mínimas non superarán os 5 graos, deixando entrever unha gran oscilación térmica entre o día e a noite. A cidade na que se rexistrarán as máximas temperaturas será Ourense, que tamén bateu récord este venres 5 de abril acadou os 15,8 graos de mínima, segundo informou esta mañá a Axencia Estatal de Meteoroloxía (AEMET).
De cara á fin de semana a situación manterase estable e sen grandes cambios. Continuarán dominando as altas presións, o tempo seco e as temperaturas elevadas. Pese á incerteza, Meteogalicia estima que se chegará aos 25 graos en gran parte de Galicia entre o venres e o sábado desta semana. Unha potente masa de aire cálido será a responsable do acusado ascenso dos termómetros, con valores elevados para a época do ano. De momento, non se prevén precipitacións no curto prazo e ata o luns da vindeira semana non semalla que as probabilidades de chuvia aumenten máis alá do 20%.
Un mes de marzo moi frío e húmido
A situación que se agarda na segunda semana de abril para Galicia contrasta co vivido durante o mes de marzo. Segundo o último informe climatolóxico de Meteogalicia, feito público este domingo, foi un mes frío e moi húmido, cunha media de precipitación acumulada 148% superior ao valor climático normal. Os lugares nos que se concentrou máis chuvia, por ser máis frecuente e persistente, foi nas serras litorais e na comarca da Baixa Limia. No que respecta ás temperaturas, o valor medio das máximas foi de 13,4 graos e, nas mínimas, de 4,8 graos.
