A tan só uns días de que dea comezo a primavera, as predicións xa apuntan a que será “máis cálida do normal” en Galicia. Así o expuxo este mércores o delegado da Axencia Estatal de Meteoroloxía (AEMET) na comunidade, Francisco Infante, quen tamen deu conta do informe meteorolóxico deste inverno. “Foi húmido e extremadamente cálido”, indicou o experto, dado que Galicia estivo 1,8 graos por enriba da media habitual para esta época do ano. Infante tamén recalcou as altas temperaturas deste inverno, que o converteron no cuarto más cálido en Galicia dende 1961.
En relación á subida dos termómetros, o delegado da AEMET en Galicia asegurou que “hai xa 27 meses que non se rexistra un mes máis frío do normal”. “Todos foron máis cálidos e algúns normais, pero non máis fríos”, informou Infante, para poñer o énfase que o último máis frío foi novembro de 2021. En canto ás choivas, o experto sinalou que houbo “un 14% máis” de precipitacións do que se agardaba. En termos numéricos, choveu durante 45 días de media, e non 40, que son os habituais.
Na análise por meses, Infante destacou de decembro as néboas persistentes no sur de Ourense e as choivas rexistradas en municipios como Rois, na provincia da Coruña. De xaneiro dixo que foi “extremadamente cálido”, igual que un febreiro “cálido” sendo un mes “moi chuvioso, un 67% máis”. De marzo resaltou o que estea a ser “máis frío do normal”, aínda que apuntou que isto se vai “corrixir rapidamente”.
Xa do balance hídrico, sentenciou que a situación, desde o 1 de outubro de 2023 ata o 30 de setembro deste ano, foi dun “superávit de precipitacións” e apuntou que “en principio” non haberá problemas coa auga, aínda que precisou que isto non compete á AEMET.
Para Semana Santa, apuntou que “de momento non hai unha predición” que poida ser concluínte por un “comportamento inestable que complica os prognósticos”, aínda que avanzou que “probablemente a semana que vén sexa máis cálida do normal e normal en canto a precipitacións”. “Climatoloxicamente falando, chove entre cinco e seis días á semana de media, o que non quere dicir que chova todo o día”, dixo aludindo, ademais, a que as temperaturas adoitan estar entre os 15 e 18 graos nas datas de Semana Santa. Para abril, maio e xuño, expuxo que hai unha “alta probabilidade de que sexa máis cálido do normal en Galicia” cun comportamento na mesma liña en canto a precipitacións.
