Ciencia en feminino, o ciclo de charlas e mesas redondas organizado por Gciencia en colaboración coa Deputación de Pontevedra, arrinca a súa nova edición. Composto por catro actividades que se desenvolverán ao londo da segunda quincena de marzo e a primeira de abril, a sesión inaugural versa sobre as vocacións científicas e como se manteñen ao longo do tempo pese aos obstáculos que as mulleres seguen a ter na ciencia.
Para iso contamos coa participación de tres científicas galegas ou que desenvolven a súa carreira en centros de investigación de Galicia. Por un lado temos á bióloga Alicia L. Bruzos, experta en cancros contaxiosos mariños, que actualmente está na Universidade de Normandía. Tamén contamos coa primeira doutora en Enxeñaría Aeroespacial da Universidade de Vigo, Uxía García Luis, que investiga no Centro de Investigación de Tecnoloxías de Telecomunición (atlanTTic) da mesma universidade. Para finalizar, participa a paleobióloga Blanca Moncunill Solé da Universidade da Coruña. Nesta mesa redonda tamén contamos, ao inicio, coa participación da deputada de Igualdade da Deputación de Pontevedra, Sandra Bastos Míguez.
