Ciencia en feminino, o ciclo de charlas e mesas redondas organizado por Gciencia en colaboración coa Deputación de Pontevedra, arrinca a súa nova edición. Composto por catro actividades que se desenvolverán ao longo da segunda quincena de marzo e a primeira de abril, a sesión inaugural versa sobre as vocacións científicas e como se manteñen ao longo do tempo pese aos obstáculos que as mulleres seguen a ter na ciencia.
Nesta terceira sesión abordamos a ciencia no estranxeiro con Raquel Lama, que investigou no grupo de Viroloxía Molecular de Peixes no Instituto Nacional para a Investigación Agronómica (INRAE) en Francia e traballaba na actualidade na USC cun contrato Juan de la Cierva; Cristina Lazcano, doutora en Bioloxía pola Universidade de Vigo (UVigo) e actualmente profesora de Solos e Nutrición Vexetal na Universidade de California Davis; e Carmen Figueras, investigadora en Londres no Instituto Francis Crick sobre o virus da gripe. O obxectivo desta mesa redonda é realizar unha comparación sobre as diferenzas na investigación entre os países onde traballan ou traballaron as invitadas co panorama galego, abordar o fomento da igualdade de xénero nos seus centros así como o lugar que ocupa a concilicación. Canto de grande é o teito de cristal aí fóra? Como se pode promover a igualdade en ciencia? Estas preguntas son respondidas trala intervención, como é habitual neste ciclo, da deputada de igualdade, Sandra Bastos.